Во напад со руски беспилотни летала врз автобус во кој имало цивили во украинскиот град Никопол загинале тројца патници, а 16 биле повредени, соопштија украинските власти. Ова следува по бранот напади во текот на ноќта во кои цивили, вклучувајќи деца, биле мртви или повредени од двете страни.
Александар Ханжа, началник на регионалната воена администрација, извести дека руските сили нападнале градски автобус со беспилотно летало во центарот на Никопол, град во регионот Дњепропетровск во источна Украина.
Според него, автобусот во тој момент застанувал, а луѓето биле внатре и во близина.
„Тоа беше намерен терор против цивили“, напиша тој на Телеграм.
Руските сили го нападнале регионот Дњепропетровск повеќе од 10 пати во текот на ноќта, изјави регионалниот гувернер.
„Едно 11-годишно момче беше убиено, а пет други беа повредени кога куќата се запали како резултат на нападот со беспилотни летала“, додаде тој.
Украинските воздухопловни сили објавија дека Русија лансирала 110 беспилотни летала во Украина во текот на ноќта.
Во меѓувреме, украинскиот претседател Володомир Зеленски и предложил пауза на Русија од нападите врз енергетската инфраструктура за време на православниот Велигден, кој ќе се одбележи претстојниот викенд.
Понудата, како што јави агенцијата АП е дадена преку Соединетите Држави, кои посредуваат во разговорите меѓу делегациите од Москва и Киев.
„Доколку Русија е подготвена да ги запре нападите врз нашата енергетска инфраструктура, ние ќе бидеме подготвени да одговориме на ист начин. Овој предлог, пренесен преку Американците, веќе ѝ е презентиран на руската страна“, рече украинскиот лидер во јавно обраќање доцна во понеделник (6 април).
Немаше непосреден коментар од Москва за предлогот. Претходните обиди за обезбедување примирје имаа мало или никакво влијание. Рускиот претседател Владимир Путин еднострано прогласи 30-часовно примирје минатиот Велигден, но секоја страна ја обвини другата дека го прекршила.
Русија ефикасно го отфрли 30-дневното безусловно примирје предложено минатата година од САД и Украина како чекор кон мир, инсистирајќи наместо тоа на сеопфатно решение, но Москва објави неколку кратки, еднострани примирја.
Русија ја започна својата инвазија на Украина во февруари 2022 година, осум години откако ја презеде контролата врз полуостровот Крим и ја поттикна војната во Донбас, кој ги вклучува регионите Донецк и Луганск во источна Украина.
Русија во моментот окупира околу 20 проценти од територијата на Украина и бара Киев да отстапи дел од регионот Донецк што нејзините сили не успеаја да го освојат во годините тешки борби.
Контролата врз Донбас е една од главните пречки во напорите со посредство на САД за завршување на војната.
Во текот на изминатите неколку месеци се одржаа неколку рунди разговори меѓу САД, Украина и Русија, но не се одржаа трилатерални или билатерални состаноци меѓу Украина и Русија од почетокот на војната меѓу САД и Израел со Иран на 28 февруари.
