За нас

Новинарството постои за да поставува прашања. Да проверува факти. Да ги држи моќните под лупа и да им служи на граѓаните. Во време на брзи вести и намалена доверба во информациите, Колегиум.мк ќе се држи до оваа едноставна, но важна работа во новинарството: довербата во информациите.

Називот Колегиум.мк не е случаен. Тоа е место на дијалог, на аргументи и на различни мислења. Редакциски простор во кој новинарството се создава преку знаење, проверка и колегијална одговорност. И простор во кој фактите се поважни од мислењата, а прашањата се поважни од готовите одговори.

Нашата цел не е само да бидеме уште еден извор на вести – туку медиум што инсистира на одговори каде тие најчесто се премолчуваат, што истражува таму каде има сомнеж и што отвори простор за информирана јавна дебата.

Целта е да отвораме и теми што често остануваат на маргините – приказни за луѓе, за локални проблеми и за одлуки што директно влијаат врз секојдневниот живот. Но, и да понудиме иновативен пристап со кој Вие ќе ги обуете чевлите на луѓе кои заглавуваат низ системот, да ги поминете скалилатата и сопките на кои секој може да наиде. Тоа е нашиот знак, нов начин на раскажување на новинарските приказни преку едноставна игра. Гејмификацијата на сториите ви нуди можност да научите како да ги избегнете пропустите во системот.  

Колегиум.мк е создаден од тимот на македонскиот сервис на Радио Слободна Европа (РСЕ) кој згасна на 31 март – не по свој избор. Но, мисијата за слободно и одговорно новинарство продолжува. Бидејќи тимот на Колегиум.мк верува во начелото дека јавноста има право не само на наслови, туку и на објаснување. Не само на изјави, туку и на контекст. Не само на кликови, туку и на одговорност. Нашата работа се темели на три принципи: проверка на информациите, глас на граѓаните и независност од какви било центри на моќ.

Затоа што за нас јавниот интерес е поважен од сè друго. Свесни сме дека довербата во медиумите денес не се подразбира. Таа мора
повторно да се гради – внимателно, чекор по чекор.

Нашиот тим

Зорана Гаџовска – Спасовска

Работи како новинарка од 2008 година. Својата кариера ја започнала во А1 телевизија, а изминатите 16 години работела како новинар и истражувач во Радио Слободна Европа. Добитничка е на наградата на УНХЦР за професионално известување за мигрантската криза, како и на неколку награди и пофалници за истражувачко новинарство.

Александар Самарџиски

Тој е активен во новинарството од 2014 година. Работел првенствено во онлајн медиуми, вклучувајќи го и интернет изданието на „360 степени“, како и во весникот „Нова Македонија“. Од 2023 до 2026 беше дел од Радио Слободна Европа. Дипломирал на Високата школа за новинарство и односи со јавноста, а дел од студиите за ги поминал и на Факултетот за општествени науки при Универзитетот во Љубљана. Учествувал во повеќе проекти, вклучително и за медиумска писменост на млади.

Сунчица Стојановска Зоксимовска

Таа има повеќе од 20 години искуство како новинар. Работела во неколку дневни весници и онлајн медиуми, а беше дел од тимот на Радио Слободна Европа од 2023 до 2026 година. Завршила неколку обуки во различни жанрови на новинарско известување, вклучително и во „Томсон Ројтерс“ во Лондон, Универзитетот во Оклахома во САД и Институтот за мир во Љубљана. Нејзиното известување за општествено значајни прашања е наградено со награди од УНДП, УСАИД и организации од граѓанското општество.

Владимир Калински

Тој работел како новинар во македонската редакција на Дојче Веле и во А2 Телевизија. Во последните 14 години беше новинар во Радио Слободна Европа. Добитник е на награди од Здружението на новинари на Македонија (ЗНМ) и од Македонскиот институт за медиуми за истражувачко новинарство на теми за загадувањето на животната средина.

Марија Тумановска

Ја започна својата кариера во Македонското радио (Радио Скопје), а од 2004 до 2026 година беше дел од Радио Слободна Европа, каде од 2023 беше уредник на вести. Таа е добитничка на награда од УНХЦР за професионално известување за лицата бегалци од руската инвазија на Украина. Таа била дел и од мисиите на ОБСЕ/ОДИХР за набљудување на изборните циклуси. Нејзините професионални предности вклучуваат силна меѓучовечка комуникација, организациски вештини, дисциплина и тимска работа.

Емил Златков

Тој е новинар повеќе од 25 години. Работел во дневните весници „Вест“ и „Дневник“, како и во порталот „Newsroom“. Од 2017 до 2026 работеше како новинар, продуцент и уредник за дигитални медиуми во Радио Слободна Европа. Исто така, бил дописник за неколку регионални дневни весници и списанија. Има сертификати од обуки за истражувачко новинарство организирани од Македонскиот институт за медиуми, Факултетот за масовни медиуми на Универзитетот во Каиро и Евро-медитеранскиот институт за новинарство во Атина.

Вања Мицевска

Таа е новинарка со над 10 години искуство, од кои поголемиот дел ги поминала во Канал 77 и неговото онлајн издание. Од 2024 до 2026 беше дел од тимот на Радио Слободна Европа. Добитничка е на награда од Здружението на новинари на Македонија и УНДП за известување за дезинформации и антиродови движења, како и пофалница од Советот за етика во медиумите за известување за животната средина. Таа е и коавторка на документарец на ПИНА за корупцијата во судството и ко-водителка на подкастот „Да биде појасно“, продуциран со БИРЦ.

Дејан Балаловски

Тој ја започна својата кариера во 2002 година во Радио Слободна Европа во Скопје, најпрво како техничар, а подоцна и како аудио продуцент. Низ годините беше ангажиран во областа на информатичката и техничката поддршка. Од 2017 работи како специјалист за ИТ поддршка, мрежен и системски администратор, а во кариерата учествувал и во реализација на различни проекти поврзани со ИТ технологии.

Благоја Кузмановски

Тој се занимава со новинарство од 1993 година, кога започнал да работи во дневната редакција на Македонското радио. Бил уредник и водител на сите дневно-политички вести на Државното радио. Од 2002 до 2022 година бил шеф на бирото на Радио Слободна Европа во Македонија, како и дописник од Македонија за балканскиот сервис на радиото. Од 2022 до 2026 година бил администратор на сервисот на македонски јазик на Радио Слободна Европа.