Борбите меѓу милитантите Хути, кои ги поддржува Иран, и меѓународно признатата јеменска влада во близина на теснецот Баб ел-Мандеб, стратегиски важен поморски премин, не стивнуваат.
Воени извори блиски до владините сили соопштија дека судирите главно се воделе во западниот дел на провинцијата Таиз, во близина на Баб ел-Мандеб, која има стратегиско значење за контрола на крајбрежјето што неодамна го зазедоа бунтовниците Хути.
Владините сили успеале да го запрат напредувањето на Хутите на два фронта, делумно и со помош на воздушни напади, наведуваат истите извори.
Според податоците на владата, околу 67.000 луѓе во регионот Таиз биле принудени да ги напуштат своите домови поради борбите.
Се верува дека поради конфликтот од почетокот на месецов вкупно повеќе од 125.000 луѓе биле раселени.
Милитантите Хути, блиски до Иран, минатата недела со молскавична офанзива ја презеле контролата врз целото западно крајбрежје на Јемен и зазеле стратегиски важни острови.
Со тоа тие добиле речиси непречен пристап до теснецот Баб ел-Мандеб, кој го поврзува Црвеното Море со Аденскиот Залив. Овој поморски премин е дел од главната бродска рута меѓу Европа и Азија.
