Австрија, Чешка, Италија, Словачка и Словенија се за постепена интеграција на земјите-кандидатки во единствениот европски пазар, верувајќи дека тоа ќе го одржи моментумот во процесот на проширување на Европската Унија (ЕУ) и ќе ги охрабри земјите-аспиранти да го забрзаат процесот на реформи, пренесува Радио Слободна Европа.
„Пристапот до единствениот европски пазар врз основа на заслуги – доколку е потребно, чекор по чекор – е таков поттик, забрзувајќи ја економската интеграција и регулаторната конвергенција, а воедно зачувувајќи ја долгорочната перспектива за полноправно членство во ЕУ“, наведуваат петте земји-членки на ЕУ во нон-пејпер, до кој имаше увид РСЕ.
Во Европската Унија, таканаречениот нон-пејпер е неформален документ чија цел е да предложи идеи, да тестира реакции или да започне дискусии за одредени прашања без да се обврзе на формален став.
Австрија, Чешка, Италија, Словачка и Словенија во овој неофицијален документ наведуваат дека постепената интеграција во клучните сектори на единствениот пазар треба активно и систематски да се спроведува кога државата кандидат ќе покаже високо ниво на усогласеност со законодавството на ЕУ во релевантниот сектор, како и силна и веродостојна примена на владеењето на правото.
Како што јавува РСЕ, се споменуваат области како што се имплементацијата на „зелените појаси“, забрзаната интеграција во енергетскиот и електричниот пазар, интеграцијата во единствениот дигитален пазар, како и во транспортниот и логистичкиот сектор, вклучувањето во стратегиите за конкурентност и индустриските политики на ЕУ, интеграцијата во политиките на ЕУ за критични суровини, спроведувањето на договорите за проценка на сообразноста и прифаќањето на индустриските производи, проширувањето на пристапот до статусот на овластени економски субјекти (ОЕО) за земјите кандидати, како и овозможувањето на мобилноста на младите.
„Овој пристап би го проширил и зајакнал единствениот пазар, придонесувајќи кон геоекономската важност и стратешката автономија на ЕУ, а воедно би ги зближил кандидатите и би помогнал во спротивставувањето на влијанието на трети земји“, се наведува во документот.
Австрија, Чешка, Италија, Словачка и Словенија сметаат дека, иако нивниот документ се фокусира на секторската интеграција во единствениот пазар, постепената интеграција треба активно да се промовира во други области на политиката на ЕУ, особено во Заедничката надворешна и безбедносна политика, како и преку постепено институционално вклучување на кандидатите.
Десет земји моментално припаѓаат на групата земји во процес на проширување: шест земји од Западен Балкан, како и Украина, Молдавија и Грузија. Турција, иако е дел од процесот на проширување повеќе од една деценија, ги замрзна преговорите за членство.
Засега, Црна Гора е единствената со веродостојна перспектива за прием во ЕУ и се смета за најверојатен иден член на европскиот блок. Таа е во последната фаза од пристапните преговори со Брисел.
Идејата за интегрирање на земјите од Западен Балкан во единствениот европски пазар ја изнесоа во февруари српскиот претседател Александар Вучиќ и албанскиот премиер Еди Рама. Во заеднички авторски текст за германскиот весник „Франкфуртер алгемајне цајтунг“ (Frankfurter Allgemeine Zeitung), тие наведоа дека земјите од регионот не треба веднаш да добијат полноправно политичко членство во ЕУ, туку дека прво треба да се интегрираат во единствениот европски пазар и Шенген зоната.
Предлогот за интеграција на земјите од регионот во Шенген зоната го презентираше и министерот за надворешни работи на Србија, Марко Ѓуриќ, на заедничкиот состанок на шефовите на европската дипломатија и министри од Западен Балкан, одржан на 11 мај во Брисел.
