Претседателката на Европската централна банка (ЕЦБ), Кристин Лагард изјави дека Европа мора да развие сопствена технологија за вештачка интелигенција и да изгради центри за податоци, за да се одбрани од можноста да биде технолошки изолирана од САД или Кина. Таа истакна дека на континентот му се потребни сопствени ВИ-модели, кои мора да бидат доволно добри за повеќето задачи и работа на домашни центри за податоци. Лагард верува дека ако Европа инвестира во сопствена технологија за вештачка интелигенција, „ќе се намали заканата од прекин“, објави Гардијан.
Во говорот во Виена, шефицата на ЕЦБ предупреди дека вештачката интелигенција се развива на друго место. Таа наведе податоци за минатата година кои покажаа дека САД произвеле 59 значајни модели, Кина 35, додека Франција и Велика Британија развиле по еден. Покрај тоа, таа истакна дека 75% од светскиот компјутерски капацитет за вештачка интелигенција, обезбеден од центрите за податоци, се наоѓа во САД, а само 5% во Европа.
