Рекордно нискиот водостој на најголемите европски реки го ограничи транспортот на стока, ја намали производството на електрична енергија и ги намали приходите на компаниите, поттикнувајќи стравувања за економските последици од екстремните горештини и нестабилните врнежи.
Додека Европа бележи најбрзо затоплување од сите континенти и рекордни топлотни бранови, сушата ја покажа потребата за преиспитување на деловните практики.
Од прометното пристаниште Ротердам до хидроелектраните во Србија, водните патишта станаа помалку сигурен начин за транспорт на стока како жито и нафта или за производство на толку потребната електрична енергија во време кога милиони луѓе се обидуваат да ги разладат своите домови.
Паѓа производството на хидро и нуклеарна енергија
Драстичниот пад на водостојот на главните речни текови на континентот создаде сериозни проблеми со ладењето на нуклеарните реактори. Ова е особено изразено во Франција, каде неколку централи веќе работат со намален капацитет за да се спречи еколошко прегревање на реките, објавија француските медиуми.
Производството на нуклеарна енергија во Унгарија и хидроенергија во Србија е намалено поради рекордно нискиот водостој на Дунав, кој минува низ големи градови како Виена, Будимпешта и Белград на патот од Германија до Црното Море, анализира новинската агенција Ројтерс.
Нуклеарната електрана Пакш, која произведува речиси половина од електричната енергија во Унгарија, ќе биде исклучена можеби и неколку недели, бидејќи се очекува водостојот на реката што ја снабдува електраната со вода за ладење да остане премногу низок за нејзино безбедно работење.
Во Хидроелектраната Ѓердап 1, најголемата хидроелектрана во Србија, производството паднало на 20 проценти од капацитетот, изјавил за Reuters директорот на производството Давор Маљковиќ, додека некогаш широкиот пловен канал покрај неа се стеснил, откривајќи песочни спрудови и чакалести наноси.
Сушата ги намалува приходите
Освен природните разорувања предизвикани од пожари и температури што довеле до илјадници дополнителни смртни случаи, климатските промени негативно влијаеле и на билансите на компаниите, објави балканскиот сервис на Радио Слободна Европа.
Австриската енергетска компанија Verbund, која минатата година околу 85 проценти од електричната енергија ја произвела од хидроелектрани, соопшти во четврток дека условите на суша ја намалиле нејзината добивка за околу 370 милиони евра во првата половина од годината во споредба со година со нормални хидролошки услови.
Француската државна енергетска компанија EDF соопшти во петок дека очекува нејзината годишна заработка пред камати, даноци, амортизација и депрецијација за 2026 година да падне за десет проценти поради ниските пазарни цени и намаленото производство на електрична енергија предизвикано од топлотните бранови.
Во Италија, сливот на реката По влезе во состојба на сериозен недостиг на вода, што ги загрозува насадите со ориз и резервите на питка вода низ северот на земјата.
Покрај сушата, беснеат и пожари
Покрај недостигот на вода, шумските пожари што беснеат низ јужниот и централниот дел на континентот создаваат директна закана за високонапонската мрежа. Неколку клучни далеководи беа превентивно исклучени поради близината на огнот и високата концентрација на чад. Ова дополнително ја отежнува дистрибуцијата на енергија меѓу соседните држави.
Властите предупредуваат дека доколку топлинскиот бран продолжи, цените на електричната енергија на берзите ќе достигнат нови рекордни нивоа.
Горештините ќе продолжат и во Македонија
Земјава и денес ќе биде под влијание на топла воздушна маса, па времето ќе биде претежно сончево и многу топло. Утринските температури ќе се движат од околу 14 до 21 степен, а дневните ќе достигнат од 35 до 41 степен, при што најтопло ќе биде во Повардарието и југоисточните делови на земјата. Во Скопје се очекува сончево време со температура до 40 степени, информираше Управата за хидрометеоролошки работи (УХМР).
Ќе дува слаб до умерен ветер, претежно од северен правец, кој повремено ќе биде поизразен долж Повардарието и во западните предели. Во планинските региони попладне не е исклучена појава на локална облачност со краткотраен дожд и ретки грмежи.
Поради високите температури, надлежните препорачуваат граѓаните да избегнуваат престој на отворено во периодот од 11 до 17 часот, да внесуваат повеќе течности и да бидат особено внимателни со постарите лица, децата и хронично болните.
Според прогнозите, жешкиот бран ќе продолжи и во наредните денови, со температури кои и понатаму ќе се движат околу или над 40 степени, без позначителни врнежи, информира УХМР.
