Четири лица загинаа во тешката сообраќајна несреќа која вчеравечер се случи на скопската обиколница, а во која учествуваа камион и патничко возило – потврди денеска (22 мај), Министерството за внатрешни работи.
Несреќата која се случила на потегот помеѓу надвозникот кај Визбегово и клучката Мирковци, била пријавена синоќа во 23 часот.
Возачот Б.Б. (76) од Косово управувајќи камион „ман“ со полуприколка со косовски таблички, изгубил контрола врз возилото, ја пробил заштитната метална ограда и преминал во спротивната лента на автопатот. Таму директно се судрил со автомобил „бмв“ со скопски регистарски ознаки, управувано од 51-годишниот Р.В. од Скопје.
Од ударот избил пожар во двете возила, а автомобилот и кабината на камионот целосно изгореле.
– На местото на несреќата, животот го загубиле возачот на автомобилот, Р.В. и сопатниците А.В. (20) и П.М. (20) од Скопје, како и уште едно лице чиј идентитет сè уште не е утврден. Лекар од Итната медицинска помош само ја констатирал смртта кај четирите лица, а по наредба на јавен обвинител, телата се предадени на обдукција, соопштија од МВР.
Возачот на камионот, 76-годишниот Б.Б., по наредба на обвинител е лишен од слобода и задржан во полициска станица за понатамошна истрага.
По целосно расчистување и документирање на случајот ќе биде поднесена соодветна пријава“, велат од МВР.
