Елон Маск, извршниот директор на „Тесла“, поранешен близок соработник на американскиот претседател Доналд Трамп и извршните директори на “Епл“ и на „Боинг“ ќе одат со Трамп при неговата посета на Кина оваа недела, изјави официјален претставник на Белата куќа за новинската агенција Ројтерс.
Меѓу другите учесници се и директори и претставници на компаниите „Мета„, „Мастеркард“, „Виса“ и десетина други.
Се очекува САД и Кина да се согласат на форуми за олеснување на меѓусебната трговија и инвестиции, а Кина да објави купувања поврзани со авиони „Боинг“, американско земјоделство и енергија, објави „Ројтерс“.
Големите деловни зделки често се објавуваат за време на самитите меѓу Кина и САД.
Двете земји, исто така, ќе разговараат за продолжување на примирјето во нивната трговска војна што дозволува ретки минерали од Кина кон САД, иако сè уште не е јасно дали тој договор ќе биде продолжен оваа недела.
„Боинг“ смета на администрацијата на Трамп да помогне да се откочи долгоочекувана голема нарачка од Кина. Тоа би била првата голема нарачка на „Боинг“ во земјата од 2017 година и би се сметало за голема победа за самитот на лидерите. Исто така, би можело да претставува најголема нарачка на авиони во историјата.
Во мај 2025, Маск ја напушти администрацијата на Трамп откако водеше бурна кампања за ефикасност, но на крајот не успеа да ги оствари најавените заштеди што ги бараше преку Одделот за владина ефикасност (DOGE).
Потоа, до тогаш блиските сојузници Маск и Трамп влегоа во конфликт поради законот за федерален буџет што се разгледуваше во Конгресот.
Тоа беше еден од клучните законодавни проекти на Трамп и предвидуваше сериозни намалувања на даноците што, според економистите, ќе го зголемат националниот долг на САД за трилиони.
Маск остро го критикуваше, велејќи дека тоа би било катастрофално и повика на намалување на трошоците и помалку олеснувања. Трамп, сепак, одговори велејќи дека е „разочаран“ од својот поранешен советник, а за неколку часа тензијата ескалираше во лични напади. Маск рече дека е „за“ импичмент на претседателот, па дури и предложи да се основа нова партија.
Последната средба меѓу Трамп и кинескиот претседател Си Џинпинг се одржа во октомври во Јужна Кореја, каде што се согласија да ја прекинат жестоката трговска војна во која САД воведоа троцифрени тарифи за кинески стоки, а Пекинг се закани дека ќе ја ограничи глобалната понуда на ретки минерали.
