Седум нови случаи на инфекција со вирусот Западен Нил се регистрирани оваа недела, соопшти Министерството за здравство (МЗ). Сите случаи се од Скопје – по два од општините Кисела Вода и Гази Баба и по еден од Илинден, Бутел и Аеродром.
Новозаболените лица се на возраст од 60 до 84 години и сите се хоспитализирани, според Министерството за здравство.
- На Универзитетската клиника за инфективни болести и фебрилни состојби во моментот се хоспитализирани вкупно 16 пациенти. Кај 15 од нив инфекцијата е лабораториски потврдена, додека за еден сомнителен случај се очекуваат резултатите. Тројца пациенти се во критична состојба и се интубирани, соопштија од Министерството за здравство.
Станувало збор за повозрасни лица со придружни заболувања. Останатите пациенти, како што се нагласува во соопштението, се во стабилна состојба и добиваат соодветен третман.
- Досега во државата се регистрирани вкупно 20 случаи на инфекција со вирусот Западен Нил. Првиот случај беше пријавен на 15 мај 2026 година во Велес.
- Најефикасна превенција е заштитата од убоди од комарци. Се препорачува да се избегнува престој на отворено во зори и во самрак, кога комарците се најактивни, како и да се користат репеленти и заштитни мрежи на вратите и прозорците. Граѓаните треба редовно да ги отстрануваат застоените води од дворовите и терасите, бидејќи тие претставуваат погодни места за размножување на комарците, соопшто Министерството за здравство.
