Републиканскиот конгресмен од Кентаки, Томас Меси, поднесе осум точки за импичмент на американскиот министер за одбрана Пит Хегсет, со што веќе оваа недела би можело да биде покренато гласање во Претставничкиот дом.
Меси во Претставничкиот дом изнесе обвиненија дека Хегсет ги ангажирал американските воени сили во борбени операции против Иран без одобрение од Конгресот. Според Меси, обвиненијата вклучуваат три прекршувања на Законот за воени овластувања од 1973 година.
Хегсет најави дека ќе се произнесе денеска за ова прашање, на својата прва прес-конференција по неколку месеци.
Меси, кој често доаѓа во судир со претседателот Доналд Трамп, иако припаѓаат на истата Републиканска партија, предупреди дека неговата иницијатива за импичмент е „само многу блага верзија на она што следува кога демократите ќе ја преземат контролата врз Претставничкиот дом и Сенатот“.
Тој го повика Трамп да го смени Хегсет додека сè уште може да обезбеди потврда од Сенатот за неговата замена.
По изборите одржани на 3 ноември, демократите повторно го презедоа мнозинството и во Претставничкиот дом и во Сенатот, а новиот состав на Конгресот ќе положи заклетва и ќе започне со работа во јануари.
Во моментов републиканците имаат мнозинство во двата дома, а Сенатот е клучен бидејќи членовите на американската администрација мора да добијат потврда од ова тело за да можат да ја извршуваат функцијата.
За покренување постапка за импичмент на Хегсет и проследување на случајот до Сенатот за судење, доволно е просто мнозинство во Претставничкиот дом, со кој во моментов раководат републиканците.
За негово конечно разрешување од функцијата би било потребно двотретинско мнозинство во Сенатот, исход што во сегашниот состав на Конгресот се чини малку веројатен.
Од друга страна, демократите подготвуваат серија сослушувања и истраги насочени кон администрацијата на Трамп.
Хаким Џефрис, демократ од Њујорк, за кого се очекува да стане претседател на Претставничкиот дом, веќе го посочи Хегсет како предмет на конгресен надзор и изјави дека без двоумење ќе го поддржи неговиот импичмент.
