Над 100.000 луѓе во Македонија работат без формално регулиран работен однос, на работно место во во нерегистрирани бизниси или како неплатени семејни работници. Најголем дел од нив се ангажирани во земјоделството, покажуваат најновите податоци на Државниот завод за статистика (ДЗС). Овој вид на вработување, според ДЗС, во статистиките се евидентира како неформално вработување, а работниците како неформално вработени.
Вкупно 101.022 лица се водат како неформално вработени, што е зголемување од 7,2 отсто во однос на претходниот квартал. Најголем дел од нив работат во земјоделството, шумарството и рибарството, каде се евидентирани 51.487 лица. Оваа бројка покажува дека тоа е 51 отсто од сите неформално вработени во земјава.
Значителен удел има и градежништвото, каде се концентрирани дополнителни 17,2 отсто од неформално вработените. Според ДЗС, сезонските активности во земјоделството и градежништвото имаат големо влијание врз движењето на неформалната вработеност.
Стапка на невработеност од 11,3 отсто
Во Македонија, во анализираниот квартал, биле вработени вкупно 708.698 лица, додека 90.020 биле невработени. Тоа ја поставува стапката на невработеност на 11,3 отсто. Вкупното активно население броело 798.718 лица. Станува збор за луѓето кои се вработени или активно бараат работа. Стапката на активност изнесувала 52,5 отсто, а стапката на вработеност 46,6 отсто.
Ако бројот на неформално вработени се спореди со вкупниот број вработени, произлегува дека тие сочинуваат околу 14,3 отсто. Практично, приближно секој седми вработен во земјава спаѓа во категоријата неформално вработени, покажува анализата на ДЗС.
Повеќе жени невработени
Податоците покажуваат и разлика меѓу мажите и жените на пазарот на труд. Од вкупниот број вработени, 57,7 отсто се мажи, а 42,3 отсто се жени. Кај невработените, 63,6 отсто се мажи, а 36,4 отсто се жени.
Во споредба со истиот период минатата година, бројот на вработени е зголемен за еден отсто, активното население за 0,8 отсто, а бројот на невработени е намален за 1,5 отсто.
Под неформална вработеност се опфаќаат повеќе облици на работа, меѓу кои работа без формално регулиран работен однос, работа во нерегистрирани бизниси, како и одредени категории неплатени семејни работници.
