Телата на две жени и еден маж се најдени во домот на осомничениот напаѓач од Краков, кој денеска пукаше на главниот плоштад во градот при што загинаа шест лица, бројот на повредени достигна до 15 лица, според досегашните информации.
Полскиот премиер Доналд Туск изјави дека се верува оти станува збор за членови на потесното семејство на осомничениот.
Полицијата извршила претрес во домот на осомничениот и неговото семејство, а премиерот предупреди дека на таа локација можеби се наоѓа поголема количина оружје.
Се врши и проверка на возилото на осомничениот, поради сомневања дека во него би можело да има експлозив.
Осомничениот е ранет, уапсен и хоспитализиран.
Туск изрази уверување дека надлежните органи набрзо ќе успеат да ги пронајдат и уапсат евентуалните соучесници на сторителот.
Шефот на полската полиција, Марек Борон, изјави дека полициските службеници размениле оган со напаѓачот три минути по првичната пријава за пукањето, која била добиена веднаш по 15.30 часот по локално време.
Тој додаде дека на местото на настанот биле испратени околу 30 полициски единици, а двајца полицајци биле оперирани поради повредите здобиени за време на инцидентот.
Полскиот министер за внатрешни работи, Марчин Кервињски, претходно изјави дека постојат индиции оти напаѓачот бил фасциниран од крајнодесничарски идеологии и застапувал радикални, ултранационалистички ставови. Истражителите сè уште работат на утврдување дали токму тоа било мотивот за нападот.
Градоначалникот на Краков, Лукаш Гибала, прогласи четиридневна жалост во градот, до 11 ноември.
Сочувство до Полска упатија и голем број странски државници и претставници на ЕУ.
Краков важи за еден од најбезбедните градови во Европа, особено во категоријата на големи туристички центри. Полска генерално има исклучително ниска стапка на насилен криминал, па затоа вакви вонредни настани, како денешниот напад, се исклучително ретки и се шок за локалното население и за светот.
