Претседателот Доналд Трамп треба да се обрати на Генералното собрание на ОН, во „бурен“ момент за светот – но и за неговото претседателствување, пишува агенцијата Асошиеитед Прес.
Глобалната економија е разнишана од неговата одлука да започне војна против Иран. Сè повеќе расте загриженоста за општествените последици од вештачката интелигенција. Исто така, постојат прашања за иднината на самите Обединети Нации, со оглед на тоа што Трамп ја намалува финансиската поддршка од САД за оваа организација.
Според Белата куќа, по говорот на годишниот собир на светските лидери, се очекува Трамп да одржи разговори со новиот британски премиер Енди Бурнам, јапонската премиерка Санае Такаичи, како и помалку формална средба со вршителката на должноста претседател на Венецуела, Делси Родригез.
Тој исто така треба да се сретне со лидери и високи претставници од земјите на Советот за соработка во Заливот – Бахреин, Кувајт, Оман, Катар, Саудиска Арабија и Обединетите Арапски Емирати – за да разговараат за натамошните чекори во врска со војната со Иран и за растечката загриженост поради неодамнешните напади на бунтовници поддржани од Иран врз Саудиска Арабија.
Посетата на ОН доаѓа во момент кога надворешнополитичкиот пристап на Трамп – особено неговата одлука да започне војна со Иран, стана товар за надежите на неговите сопартијци републиканци да ја задржат контролата врз двата дома на Конгресот на претстојните избори на средината од мандатот. Сепак, претставници на администрацијата најавија дека Трамп во своето обраќање ќе истакне оти светот е во подобра положба благодарение на неговото лидерство.
„Очекуваме претседателот да нагласи како тој и неговата администрација директно се соочиле со сложени проблеми ширум светот“, изјави за новинарите амбасадорот Мајк Волц, главниот пратеник на Трамп во оваа меѓународна организација.
Волц исто така навести дека Трамп може повторно да се осврне на некои од своите долгогодишни критики упатени кон Обединетите Нации. Претседателот ја критикуваше организацијата како неефикасна во прашањата за војна и мир, тврдеше дека таа спроведува „измама“ преку нагласување на потребата за справување со глобалното затоплување и изјавуваше дека ОН ја поттикнале „инвазијата“ на мигранти во Европа.
Војната со Иран како доминантна тема
Во минатогодишното обраќање пред ОН, Трамп тврдеше дека САД ги „уништиле“ нуклеарните капацитети на Иран откако нареди бомбардирање на три клучни постројки во јуни 2025 година. Тој се враќа на Генералното собрание додека се приближува седмиот месец од новата војна против Иран – војна за која тој инсистира дека е неопходна за справување со нуклеарната закана што ја претставува Иран.
Ситуацијата во војната стана посложена, иако во нападите на САД и Израел беше елиминиран голем дел од највисокото раководство на Иран и беа уништени неговите воздухопловни и поморски сили, додека американската блокада на иранската нафта го доведе Техеран до економски колапс.
Транспортот на нафта од другите земји од Заливот низ Ормускиот Теснец е подобрен во последните недели, благодарение на помошта од американската морнарица која ги насочува комерцијалните бродови низ тесниот воден пат. Сепак, протокот на нафта е значително под нивоата од пред војната. Цената на суровата нафта од типот „Брент“ продолжува да се движи околу 100 долари за барел, што е пораст во однос на нивото од околу 70 долари во неделите пред почетокот на војната.
Администрацијата ќе потпише договор за Гренланд
На минатогодишното Генерално собрание, Трамп се фалеше со својот учинок како миротворец и тврдеше дека „сите велат оти треба да ја добијам Нобеловата награда за мир“ поради напорите на неговата администрација да посредува во неколку конфликти ширум светот.
Оваа година, неговата администрација треба да потпише договор со данските лидери и оние од Гренланд, на маргините на Генералното собрание. Целта на договорот е да се трасира патот за проширување на военото присуство на САД на Гренланд.
Договорот, најавен минатата недела, беше постигнат откако Трамп постојано се закануваше дека ќе го „преземе“ Гренланд – (територија на Данска, која е сојузник во НАТО) – доколку е потребно и со воена сила.
Според договорот, Гренланд останува територија на Данска.
„Со нетрпение ја очекувам утрешната средба. Мислам дека постигнавме добар договор“, изјави премиерката Мете Фредериксен за данскиот емитер „ТВ2 Данска“.
Расте фрустрацијата на Трамп поради војната меѓу Русија и Украина
Претседателот Трамп можеби ќе се осврне и на тековната војна на Русија против Украина за време на своето обраќање – конфликт за кој, во текот на својата кампања за изборите во 2024 година, предвидуваше дека ќе биде решен уште првиот ден од неговиот втор мандат.
Тој често изразува фрустрација поради овој конфликт. Не крие дека неговото трпение е ставено на искушение поради нападите на Украина врз руските рафинерии за дизел – прашање што придонесе за нестабилноста на пазарите на нафта – како и поради руските напади врз украинската енергетска мрежа. Минатата недела Трамп тврдеше дека ги убедил двете страни да се согласат да не ја напаѓаат меѓусебната енергетска инфраструктура.
Украинскиот претседател Володимир Зеленски изјави дека е подготвен да го прифати планот на Трамп доколку Русија се придржува кон него. Русија соопшти дека би можела да го прифати предлогот на Трамп за енергетско примирје, само доколку претходно се укинат западните енергетски санкции против Москва.
Двете страни продолжија да изведуваат напади врз рафинерии и друга енергетска инфраструктура. Во понеделникот, пред да замине за Њујорк, Трамп го изрази своето незадоволство поради нападите врз енергетската инфраструктура.
„За жал, Русија ја загуби контролата врз својата индустрија за дизел гориво поради војната со Украина“, објави Трамп на социјалните мрежи и додаде: „Оваа апсурдна војна со Украина, на која ѝ нема крај, мора да заврши“.
Трамп ќе одржи важни разговори со лидерите на Обединетото Кралство, Јапонија и Венецуела
Претседателот треба да ја одржи својата прва средба лице в лице со Барнам, лидерот на Лабуристичката партија од левиот центар, кој стана премиер во јули.
Со оглед на тоа што високите цени на нафтата ја оптоваруваат британската економија, тој веројатно ќе сака да разговара и за начини за целосно повторно отворање на Ормускиот теснец. Во понеделникот тој најави дека ќе испрати авион на Кралските воздухопловни сили на Блискиот Исток за да ѝ помогне на Саудиска Арабија да се одбрани од нападите на бунтовниците Хути. Авионот ќе врши полнење гориво на саудиските авиони за време на одбранбените мисии.
Средбата на Трамп со јапонската политичарка Такаичи се одржува додека тој се подготвува да го пречека кинескиот претседател Си Џинпинг во Вашингтон подоцна оваа недела, во рамките на државна посета.
Историски сложените односи меѓу Јапонија и Кина станаа уште позатегнати откако Такаичи минатата година изјави дека јапонската војска би можела да интервенира, доколку Кина преземе акција против Тајван – полуавтономен остров со демократско уредување што Пекинг го смета за своја територија. Тензиите се прелеаја и врз економските односи меѓу Кина и Јапонија.
Средбата на Трамп со Родригез, привремената претседател на Венецуела, ќе биде прва меѓу двајцата лидери откако Трамп во јануари нареди американска воена операција за апсење на тогашниот претседател Николас Мадуро и негово префрлање во Њујорк, каде што треба да се соочи со федерални обвиненија за нарко-тероризам и трговија со дрога. Адвокатите на Мадуро упатија приговори против американската воена акција со која тој беше отстранет од власт.
