Американскиот претседател Доналд Трамп во петокот изјави дека ги испраќа специјалните пратеници Стив Виткоф и Џаред Кушнер во Москва и Киев со план за ставање крај на повеќе од четиригодишната војна во Украина, јавува новинската агенција Франс Прес (АФП). Овој потег го претставува најновиот обид на Вашингтон да го прекине дипломатскиот застој во најкрвавиот конфликт во Европа од Втората светска војна, кој започна со целосната инвазија на Русија врз Украина во 2022 година.
Висок украински официјален претставник изјави за АФП дека пратениците се очекува да пристигнат во Киев во недела.
Американскиот медиум Аксиос објави дека тие ќе се сретнат со рускиот претседател Владимир Путин во Москва во сабота, а потоа со претседателот Володимир Зеленски во Киев во недела. Кремљ одби да даде коментар. Трамп изјави дека двајцата преговарачи ќе се обидат да проценат дали е можен напредок кон мирот.
Мировните напори беа во застој поради војната на Вашингтон со Иран, додека Москва и Киев ги интензивираа нападите со долг дострел, зголемувајќи ги цивилните жртви на нивоа невидени од почетокот на борбите.
„Ги испратив Стив Виткоф и Џаред Кушнер, двајца одлични преговарачи. Сработија одлична работа и ги испративме да видат дали можеме нешто да постигнеме. И има голема шанса да успееме“, рече Трамп.
„Со себе носат предлог за завршување на војната“, додаде тој.
Американскиот претседател не откри дали планот вклучува отстапување територии од страна на Украина, како што претходно предлагаше, но додаде: „Имаме идеја за мир.“
Ова ќе биде првпат пријателот и бизнисмен на Трамп, Виткоф, и неговиот зет Кушнер да го посетат разорениот Киев откако Трамп се врати на функцијата минатата година со ветување дека ќе го реши конфликтот. Виткоф и Кушнер, кои беа вклучени во преговорите за прекин на огнот во Газа и Иран, повеќепати патуваа во Москва во претходните дипломатски обиди.
Новиот дипломатски притисок доаѓа додека Русија и Украина жестоко се напаѓаат со проектили со долг дострел и беспилотни летала.
Само неколку часа пред објавата на Трамп, руски дрон го погоди штабот на украинската безбедносна служба СБУ во централниот дел на Киев, според Зеленски. Нападот, за кој Зеленски рече дека бил насочен кон канцеларијата на в.д. шефот на агенцијата, е прв таков удар врз нејзиниот штаб од почетокот на инвазијата.
И покрај невидениот карактер на овој напад, украинскиот претседател предложи почитување на прекин на огнот со Русија додека трае посетата на американските емисари.
„Од наша страна нема да има воздушни напади, а Русија мора реципрочно да обезбеди прекин на огнот — без сопствени воздушни напади — за времето потребно за спроведување на овие разговори“, рече тој во своето вечерно обраќање.
Русија не даде коментар за овој предлог, пишува новинската агенција Франс прес.
