Пожарот кај селото Белица во општина Македонски Брод и натаму е активен, а на терен се повеќе од 60 луѓе кои се обидуваат да го стават огнот под контрола. Во гаснењето се вклучени тимови на ЈП „Јасен“, екипи на Дирекцијата за заштита и спасување, како и доброволци.
Директорот на ДЗС, Стојанче Ангелов, уверува дека нема опасност пожарот да стигне до селото.
„Селото во никој случај нема да биде загрозено. Огнот е далеку од селото“, изјави Ангелов.
Тој информира дека на терен дејствуваат тимови на ДЗС со возила „пинцгауер“, како и тимови составени од доброволци. Со дувалки се работи на создавање противпожарни појаси на местата каде што постои опасност огнот да навлезе во квалитетна борова шума.
Според Ангелов, во моментов на терен има повеќе од 60 луѓе од Скопје и Македонски Брод кои се ангажирани во справувањето со пожарот.
Во меѓувреме, Центарот за управување со кризи соопшти дека до 13 часот на територијата на Македонија се регистрирани 12 пожари. Пет од нив се активни, пет се под контрола, а два се целосно изгаснати.
Дополнителна надеж за стабилизирање на состојбата со пожарите се очекува да донесат и најавените врнежи. Управата за хидрометеоролошки работи информираше дека има нестабилност во западните делови од земјата, со поинтензивни врнежи во Кичевскиот регион и северозападните планински предели. Нестабилноста се движи од југозапад кон североисток.
