Шумски пожар избувна во близина на делчевското село Бигла откако лице палело гуми во својот двор и изгубило контрола врз огнот, по што пожарот се проширил во блиската борова шума.
Директорот на Дирекцијата за заштита и спасување (ДЗС), Стојанче Ангелов информира дека веднаш по пријавата биле ангажирани сите расположливи сили од Делчево, како и пожарникари и екипи од соседните противпожарни единици.
„Неодговорно лице палело гуми во својот двор во селото Бигла, кое е село од разбиен тип, односно куќите се распоредени на неколку ридови. При тоа, лицето изгубило контрола врз огнот, по што пожарот се проширил во блиската шума. Во моментов во Бигла има голем шумски пожар во борова шума. Од страна на градоначалникот веднаш се ангажирани сите расположливи сили од Делчево“, рече Ангелов.
Тој додаде дека на терен се излезени пожарникари, а побарана е помош и од соседните противпожарни единици.
„Во моментов кон местото на пожарот се упатуваат и три трактора од Дирекцијата за заштита и спасување, а веќе е ангажиран и хеликоптер на полицијата“, изјави Ангелов.
Во меѓувреме, општината ангажирала и тешка механизација, трактори и булдожери, кои треба да направат противпожарни пресеци меѓу пожарот и селото Бигла, за да не дојде до загрозување на куќите.
Во меѓувреме, лицето кое го предизвикало пожарот, заедно со еден пожарникар и припадник на ангажираните служби, вдишале поголема количина чад додека се обидувале да го локализираат огнот поради што превентивно се пренесени на лекарски преглед.
Надлежните најавија дека повеќе информации за состојбата со пожарот ќе бидат соопштени во текот на денот по добивањето дополнителни податоци од терен.
