Генералниот секретар на НАТО, Марк Руте, изрази солидарност со Полска откако летечки објект, за кој владата во Варшава се сомнева дека е руска ракета, падна во близина на украинската граница.
Руте разговараше за „повредата на полскиот воздушен простор од страна на руска ракета“ со полскиот премиер Доналд Туск, соопшти денеска шефот на НАТО.
И Полска и НАТО ги активираа своите воздушни и копнени одбранбени системи, рече Руте.
„Изразуваме солидарност со Полска и ќе продолжиме да ја зајакнуваме нашата подготвеност за одбрана од каква било закана, вклучително и ракетни напади. Овој инцидент е уште еден непромислен чин на Русија и опасна последица од нејзината војна против Украина“, изјави Руте.
Летечкиот објект што во текот на ноќта падна во Полска во близина на украинската граница веројатно е руска ракета, изјави Туск претходно денеска.
„Сè укажува на тоа дека станува збор за руска крстосувачка ракета Х-101 (CH-101), но не сакаме да ги прејудицираме резултатите од темелната истрага“, рече Туск во источниот град Лублин за време на посетата на местото на падот.
Инаку, неидентификуван летечки објект влезе во полскиот воздушен простор и падна за време на силните руски воздушни напади врз соседна Украина во текот на ноќта, соопшти полската армија денеска.
Оперативната команда на вооружените сили соопшти дека објектот паднал во ненаселена област во близина на селото Тарнава Колонија, на околу 90 километри јужно од Лублин, каде што рано наутро се огласија сирените за воздушна опасност.
Заменик-министерката за одбрана Магдалена Собковјак-Чарнецка изјави дека никој не е повреден во инцидентот и оти нема материјална штета.
Армијата соопшти дека неидентификуваниот објект бил забележан во полскиот воздушен простор околу 3:40 часот наутро, движејќи се во западен правец. Борбен авион Ф-16 веднаш бил подигнат за да го идентификува, но летечкиот објект потоа исчезнал од радарите. Екипажот на хеликоптер подоцна го лоцирал местото на падот.
Полицијата во Лублин на платформата Х соопшти дека жителите пријавиле силна експлозија во раните утрински часови. Во близина на Тарнава Колонија, полициските службеници пронајдоа кратер со дијаметар од 10 метри.
Раководството во Киев ја префрли одговорноста за инцидентот на Русија.
„Во текот на ноќта, руска крстосувачка ракета Х-101 навлезе во Полска како дел од масовниот руски напад врз Украина, со што го повреди воздушниот простор на НАТО. Ова е уште еден јасен доказ дека зајакнувањето на украинската воздушна одбрана сега е итно и служи како гаранција за заштита на целата евроатлантска заедница“, напиша министерот за надворешни работи Андриј Сибиха на Х.
Од почетокот на руската инвазија врз Украина, полскиот воздушен простор беше повреден неколку пати.
Во септември, голем број дронови навлегоа во полскиот воздушен простор за време на руски напад врз Украина. Полските воздухопловни сили и другите сојузници од НАТО тогаш за првпат соборија дел од проектилите.
