Американскиот државен секретар Марко Рубио во средата изјави дека САД и натаму се подготвени да преговараат за ставање крај на кризата со Иран, но оцени дека Техеран не покажува сериозна намера за разговори, додека продлабочувањето на конфликтот ги нарушува двата најважни светски енергетски поморски коридори.
Рубио ова го изјави на состанокот на министрите за надворешни работи на земјите од Југоисточна Азија, само еден ден откако три танкери со саудиска сурова нафта, наменети за азиските пазари, го сменија курсот во Црвеното Море, очигледно поради заканите од јеменските Хути, кои се сојузници на Иран.
Хутите, кои го контролираат брегот кај влезот во Црвеното Море, во понеделникот прогласија поморска блокада на Саудиска Арабија, отворајќи потенцијално нов фронт во војната што од 28 февруари, кога САД и Израел започнаа напади врз Иран, однесе илјадници животи низ регионот на Персискиот Залив, јавува новинската агенција Ројтерс.
Бидејќи Иран веќе се заканува со попречување на бродскиот сообраќај низ Ормутскиот Теснец, кој е главната поморска врска од Персискиот Залив, Црвеното Море стана клучната алтернативна рута за транспорт на милиони барели саудиска нафта дневно.
Висок ирански функционер во понеделникот изјави за Ројтерс дека Техеран добил предлог од посредници за 10-дневен прекин на огнот, како дел од напорите да се спаси привремениот договор за примирје што САД и Иран го потпишаа во јуни, а кој го замени претходниот договор за прекин на огнот од април.
Како уште еден знак дека дипломатските напори сè уште не се исцрпени, иранскиот министер за внатрешни работи Ескандар Момени го посети Пакистан, кој посредува во кризата, и побара Исламабад да продолжи со своите посреднички напори.
Рубио изјави дека Вашингтон „секогаш бил посветен на дипломатијата“, но изрази сомнеж дека Техеран има исто толку сериозна намера да преговара.
„Проблемот во моментов е што тие не се сериозни во врска со разговорите. Ако се сериозни, и ние сме сериозни. Ако не се, ќе го направиме она што е неопходно за да ги заштитиме нашите интереси, како и интересите на нашите сојузници“, изјави Рубио во Манила.
Тој нагласи дека не смее да му се дозволи на Иран да го контролира Ормутскиот Теснец, предупредувајќи дека тоа би создало опасен преседан за целиот свет, вклучително и за земјите од Југоисточна Азија, од кои многу имаат територијални спорови со Кина во Јужното Кинеско Море.
„Ако создадеме преседан на Блискиот Исток една држава да одлучува дека ќе контролира меѓународен поморски пат, ќе наплаќа патарина и, ако не ѝ платите, ќе ги уништува вашите бродови, тогаш сме создале многу опасен преседан што ќе се повтори и во други делови од светот, вклучително и во овој регион“, изјави Рубио.
