Шумски пожари поттикнати од силни ветрови беснееја во повеќе делови на Грција во саботата (1 август), принудувајќи ги жителите да ги напуштат своите домови, додека условите повторно се влошија во делови од Шпанија и Франција – објави новинската агенција Ројтерс.
Во еден од пожарите што брзо се прошируваше во Грција, пожарникарите, полицијата и екипите на итната медицинска помош постепено се повлекуваа пред огромниот огнен фронт и густиот чад што ги зафаќаа шумите и ниската вегетација во близина на Порто Гермено, на Коринтскиот Залив, околу 60 километри северозападно од Атина.
„Ситуацијата е исклучително тешка, особено денес. Имаме навистина силни ветрови, со налети што надминуваат 73 километри на час. Насоката на ширење на пожарот не може лесно да се утврди“, изјави лекарот и припадник на службите за итен одговор, Ѓоргос Дулас.
Порто Гермено, популарното туристичко место на брегот на Коринтскиот Залив, се бореа да го заштитат речиси 500 пожарникари додека пламените јазици пустошеа низ густата борова шума, а густиот чад го затемни сонцето.
Пожарот избувна во петокот во близина на соседното крајбрежно село Агиос Василиос. Околу 300 лица беа евакуирани по морски пат, а властите во саботата издадоа нови наредби за евакуација – пишува новинската агенција Асошиејтед прес (АП).
Европа ова лето е погодена од разорни шумски пожари по низа рекордни топлотни бранови и долготраен недостиг од врнежи, услови кои според научниците, дополнително се влошени поради климатските промени.
Во југозападниот дел на Франција, пожарникарите успеаја да го стават под контрола големиот шумски пожар, по што на околу 198.000 жители им беше дозволено да се вратат во своите домови, по, како што се смета, најголемата евакуација во мирновременски услови во историјата на земјата.
Големите пожари во Шпанија, исто така, повеќе не се ширеа, додека главниот пожар во Португалија беше ставен под контрола.
Вториот голем пожар во Франција престана да се шири во текот на ноќта, откако во петокот за само шест часа зафати површина од 10 квадратни километри. Сепак, пожарот и натаму беше активен во саботата, а 2.500 лица сè уште не можеа да се вратат во своите домови.
Подобрувањето на состојбата во западна Европа е значителен пресврт во однос на врвот на кризата, кога пожарите само во Франција и Шпанија принудија околу една третина од милион луѓе да ги напуштат своите домови и туристичките сместувања, ги испразнија градовите во екот на летната туристичка сезона и ги ставија под огромен притисок пожарникарите, противпожарните авиони и службите за итни интервенции, кои истовремено се справуваа со повеќе големи пожари.
