Еден човек загина при сообраќајна несреќа на превојот Плетвар. Полицискиот увид е во тек, а сообраќајот е во целосен прекин, велат од Министерството за внатрешни работи. Станува збор за превртен камион со битолски регистарски ознаки.
Несреќата се случила околу 17 часот. Сообраќајот е во прекин, а конвој со возила е заглавен речиси два часа. Возачи велат дека колоната од возила што чекаат е долга околу 20 километри.
Прекинот, како што информира ЈП „Македонијапат“, е поради превртено товарно моторно возило и истурен песок на коловозот, што го оневозможува одвивањето на сообраќајот.
