Утрово во 7 часот во Словенија се отворија повеќе од 3.000 избирачки места, каде што граѓаните гласаат на четири референдуми, три советодавни и еден законодавен.
Ова гласање се смета за прв тест за десничарската влада на Јанез Јанша откако беше формирана во јуни оваа година, но и колку успешно власта и опозицијата можат да ги мобилизираат своите гласачи.
На законодавен референдум, словенечките граѓани ќе одлучат дали се за останување на сила на постојниот закон за парламентарна истрага или не, а за да биде отфрлен законот, најмалку една петтина од сите гласачи со право на глас мора да гласаат „за“.
Советодавните референдуми не се обврзувачки, а граѓаните ќе гласаат на нив „за“ или „против“ укинувањето на претплатата за Радио-телевизија на Словенија, за условување на социјалната помош со општествено корисна работа, како и за правото на глас на државјаните на трети земји на локалните избори.
За сите четири референдуми, Јанша бара граѓаните да се изјаснат „за“.
Избирачките места ќе останат отворени до 19 часот до кога важи и изборниот молк. Првите резултати од денешното гласање се очекуваат по 20:30 часот, објави Словенечката новинска агенција (СТА).
Гласачите сами одлучуваат на колку референдуми сакаат да гласаат, а Државната изборна комисија забележува дека можат да одат на гласачкото место само еднаш.
Изборната комисија објави дека изборните комисии прво ќе го утврдат исходот од гласањето на законодавниот референдум, потоа на консултативните референдуми за социјална помош, за правото на глас на локалните избори и конечно за укинувањето на задолжителното плаќање на придонесите за јавниот сервис.
