Мароканската полиција на 15 август уапси најмалку 111 луѓе кои се обидувале да влезат во шпанската северноафриканска енклава Сеута. Ова се случува во услови на засилена безбедност од двете страни на границата, откако разни објави на социјалните мрежи повикаа на уште едно масовно преминување на мигранти.
Саботниот обид за нелегален премин на границата дојде две недели откако повеќе од 72.000 мигранти влегоа во Сеута, предизвикувајќи тензии во рамките на Европската Унија и поттикнувајќи реторика против имиграцијата кај крајно десничарските партии ширум светот. Најмалку 96 лица загинаа во обидот да стигнат до европско тло.
Извор од Министерството за внатрешни работи на Мароко за новинската агенција Ројтерс изјави дека меѓу приведените има 109 мигранти од подсахарска Африка и двајца марокански државјани кои биле уапсени во или околу Фнидек, мароканскиот град спроти Сеута.
Според шпанската новинска агенција ЕФЕ, мароканската полиција употребила солзавец за да ги растера групите мигранти собрани на ридовите на околу 3 километри од границата.
Новинската агенција Ројтерс подоцна сними видео инсерти од стотици полициски службеници, некои во опрема за разбивање демонстрации, а други во цивилна облека, како се враќаат од ридовите надвор од Фнидек.
Шпанскиот јавен сервис ТВЕ и новинската агенција ЕФЕ соопштија дека Мароканското министерството за внатрешни работи им наредило на нивните новинари веднаш да го напуштат Фнидек, без да даде објаснување.
Во Сеута, шпанските војници чуваа супермаркети, додека полицијата интензивно патролираше по главните улици на енклавата. Градот беше помирен отколку во деновите по смртоносниот обид за премин на 30 јули.
Мадрид во меѓувреме постави поморска бариера и распореди повеќе од 500 дополнителни полицајци од копнена Шпанија, со што вкупниот број во Сеута се искачи на повеќе од 1.600. Министерството за внатрешни работи соопшти дека засилувањето ќе остане колку што е потребно.
