Стотици мигранти кои неодамна влегоа во шпанската енклава Сеута во Северна Африка протестираа на градската плажа, барајќи од шпанските власти да им дозволат да останат и да поднесат барања за азил, наместо да бидат вратени во Мароко, јавува новинската агенција Ројтерс.
Според проценките, во Сеута сè уште се наоѓаат меѓу 5.000 и 8.000 мигранти, кои беа дел од масовниот премин на границата пред две недели, кога во енклавата влегоа повеќе од 72.000 луѓе. Поголемиот дел од нив во следните денови доброволно се вратија во Мароко.
Поради преоптоварените ресурси, дел од оние што останаа живеат во тешки услови на плажата Ел Трамполин или на периферијата на градот, чекајќи можност да продолжат кон континентална Шпанија.
„Спиеме крај морето, на студ и во лоши услови. Многу страдаме“, изјави Ајуб Еларуд од Тетуан, кој тврди дека полицијата ги спречува мигрантите да се движат кон центарот на Сеута.
На протестот мигрантите носеа шпански знамиња и транспаренти со пораките „Не сакаме да се вратиме во Мароко“ и „И ние сме луѓе“, додека извикуваа „Уморни сме“ и „Ни треба решение“.
Шпанскиот министер за внатрешни работи Фернандо Гранде-Марласка претходно изјави дека на мигрантите кои илегално влегле во енклавата нема да им биде дозволено ниту да останат во Сеута, ниту да продолжат кон континентална Шпанија, освен во ретки случаи на лица со особена ранливост.
