Штетата од шумските пожари во Европа веќе се мери во милијарди евра, јавуваат светските медиуми. Последиците од пожарот врз економијата на ниво на Европската Унија беа проценети на околу две и пол милијарди евра, но оваа сума беше надмината веќе во првата половина од годината.
Низ цела Грција, пожарите оставија изгорени куќи и уништен имот. Пожарите уништија и уникатни екосистеми. Екипи за спасување животни и ветеринари го пребаруваа природниот резерват „Високи мочуришта“ во Белгија откако пожар опустоши една од еколошки најважните области во земјата. Тие бараа диви животни повредени во пожарот.
„Веќе неколку дена со извиднички возила ја обиколуваме областа за да провериме дали животните се заробени зад оградите или се загрозени од чадот“, изјави Мајкл Роберт, координатор за спасување животни.
Најголемиот пожар во историјата на Белгија предизвика непоправлива штета на ретки и строго заштитени живеалишта. Во целата земја има само три такви живеалишта, за кои се потребни илјадници години за да се развијат.
„Ова се многу заштитени и ретки живеалишта. Потребни се илјадници години за да се развијат и да се наполнат со вегетација. Од тие три, две се неповратно уништени“, вели Ив Пипер, шумски службеник за областа Вервје.
Пожарот што беснее во областа „Високи мочуришта“ од петокот не се прошири понатаму, а во текот на ноќта не се појавија нови жаришта.
Пламените оставија зад себе изгорен и опустошен пејзаж од околу 3.000 хектари.
„Мораме да ги пронајдеме сите жаришта, места каде што пожарот сè уште тлее. Кога ќе ги пронајдеме, треба добро да ги натопиме со вода за да ги изгаснеме целосно. Некои жаришта не се видливи на почетокот и само кога огнот повторно ќе се разгори, можеме темелно да ги наводнуваме и да ги изгасиме“, изјави пожарникарот Николас Хенон.
Сателитските снимки го откриваат обемот на уништувањето по пожарите што ја опустошија Европа летово.
Речиси половина милион хектари изгореа во петте најтешко погодени земји – Франција, Шпанија, Португалија, Грција и Романија – повеќе од дваесет лица загинаа, а стотици илјади жители беа принудени да ги напуштат своите домови.
