Министрите за надворешни работи на Г7 и нивниот колега од Украина денеска во Париз ќе разговараат за начините на кои можат да помогнат во одбраната на Украина од Русија.
Украинскиот министер Андриј Сибиха ќе го започне денот со средба со американскиот државен секретар Рубио во Париз, по што ќе учествува на состанок со сите министри од групата Г7 во француското Министерство за надворешни работи.
Главна тема ќе биде воената и безбедносната помош за Украина, која беше намалена од администрацијата на американскиот претседател Доналд Трамп. Таа одлука предизвика загриженост во Киев, но и во европските престолнини – особено во Париз, Берлин, Рим и Лондон, чии земји се членки на Г7. Сè уште не е познато дали САД или некоја од другите членки на Г7 ќе најават нова помош за Украина.
Германскиот министер за надворешни работи, Јохан Вадефул, кој вчера во Париз, на маргините на состанокот на Г7, одржа одвоена средба со Рубио, јасно стави до знаење дека Европа мора да биде вклучена во разговорите за Украина, говорејќи за преговорите меѓу Русија и Украина со посредство на САД, кои почнаа денеска во Абу Даби.
„Останувам многу благодарен на Соединетите Држави за вложувањето максимални напори да ги доведат спротивставените страни на преговарачката маса“, рече Вадефул. „Но, уште еднаш јасно ставив до знаење дека и Европа мора да биде на таа маса. Не постои решение без Европа“, додаде тој.
Рубио изјави дека САД немаат ништо против европските нации да се вклучат во директни преговори во одредена фаза, но смета дека за тоа сè уште не е дојдено времето.
„На крајот, тоа би било позитивен развој на настаните, но претстои уште долг пат“, им рече тој на новинарите по целодневен циклус на заеднички и билатерални средби со неговите колеги од Г7.
„Сепак, добро е што разговараат, добро е што трилатералните преговори се повторно почнати. Тоа е подобро отколку воопшто да нема преговори“, додаде тој.
Во пресрет на новите преговори, Русија вчера повторно изврши силен напад врз украинската електроенергетска мрежа.
Истовремено, украинските сили погодија уште една од најголемите руски рафинерии за нафта.
Борбите продолжуваат, а засега нема индикации дека која било од страните е подготвена да се откаже од своите барања.
