Денеска (13 август) се одбележувааат 25 години од потпишувањето на Охридскиот рамковен договор, политички договор со кој беше ставен крај на неколкумесечниот конфликт во Македонија во 2001 година меѓу македонските безбедносни сили и тогашна Ослободителна народна армија на Албанците (ОНА).
Повеќе од 130 закони, законски измени и дополнувања се донесени во изминатите години од имплeментацијата на Охридскиот рамковен договор, од кои најголем дел – 59 се закони за правична застапеност, 40 се во сферата на идентитет, култура, образование и децентрализација на власта.
Во Владата денеска ќе се одржи свечена седница, на која ќе се обратат првиот вицепремиер и министер за европски прашања Беким Сали и вицепремиерот и министер за транспорт Александар Николоски. Попладнево, пак, е најавена панел – дискусија за наследството, предизвиците и иднината на овој договор.
Рамковниот договор беше потпишан пред 25 години, на 13 август во Скопје, по завршување на преговорите кои се одвиваа во Охрид, со што официјално се стави крај на конфликтот од 2001 година.
Договорот беше потпишан во претседателската резиденција на Водно во Скопје од страна на тогашниот претседател на државата Борис Трајковски, тогашниот премиер и лидер на ВМРО-ДПМНЕ, Љубчо Георгиевски, како и тогашните лидери на СДСМ, Бранко Црвенковски, на ПДП, Имер Имери и на ДПА, Арбен Џафери.
Во основните принципи на документот се наведува дека целосно и безусловно се отфрла употребата на насилство за остварување политички цели.
Свои потписи на договорот ставија и специјалните претставници на ЕУ и на САД, Франсоа Леотар и Џејмс Пердју.
За успешна имплементација на договорот, беше формиран Секретаријат за спроведување на Охридскиот рамковен договор, кој во 2019 година се трансформираше во Министерство за политички систем и односи меѓу заедниците.
