Очекуваниот туристички бум во САД со Светското фудбалско првенство не се реализира, пишува во својата анализа новинската агенција Ројтерс. Бројот на меѓународни посетители е во милиони, ама резервациите вохотелите и авиокомпаниите бележат намалување.
Очекувањата за милионски прилив на навивачи се намалуваат. ФИФА предвидува 1,2 милиони посетители, но хотелската асоцијација на Њујорк очекува само половина милион. Цените на билетите за натпревари достигнуваат рекордни нивоа, визите и строгата гранична контрола дополнително ги одвраќаат странските навивачи.
Хотелите во Њујорк и други градови домаќини ги намалуваат цените, но побарувачката останува слаба. Резервациите за летови од Европа паднале за речиси 4%, а за Њујорк – домаќин на финалето – за над 15%. Дури и богатите навивачи чекаат исходи од групната фаза пред да се обврзат на патување.
Светла точка се изнајмувањата за одмор: Airbnb и други платформи бележат раст на резервациите, особено во буџетскиот сегмент. Просечните дневни цени за станови скокнуваат од 218 на 335 долари, што покажува дека дел од побарувачката се пренасочува кон алтернативно сместување.
Високите трошоци, визите и логистиката го пригушуваат традиционалниот туристички ефект на Светското првенство, оставајќи ја американската индустрија со многу пониски резултати од очекуваните, е заклучокот во анализата на Ројтерс.
