Србија ја обвини Хрватска за мешање во нејзината изборна кампања, посочувајќи го и известувањето на хрватските медиуми. Парламентарните избори во Србија се одржуваат на 25 октомври.
Хрватскиот премиер Андреј Пленковиќ ги отфрли обвинувањата, а протестната нота од Белград ја нарече „смешна и целосно бесмислена“.
Во нотата што српското Министерство за надворешни работи ја испратило до Хрватска, според содржината што ја пренесуваат српските медиуми, се оценуваат како неприфатливи обидите за надворешно влијание врз изборните процеси и одредени начини на медиумско известување за политичката состојба во Србија.
Белград приговара дека внатрешните политички случувања се прикажуваат еднострано и крајно негативно, како и дека се поврзуваат со наводна закана за регионалната стабилност. Според српското министерство, таквиот пристап ја нарушува меѓусебната доверба и не придонесува за добрососедски односи.
Пленковиќ, пак, порача дека хрватските медиуми се слободни и сами одлучуваат што ќе објавуваат.
„Го видов текстот на нотата, се обидувам да разберам што сме направиле. Ако мислат дека ние го оркестрираме она што го пишуваат хрватските медиуми, тоа е нивна работа“, изјави тој, додавајќи дека не забележал ништо особено контроверзно во известувањето.
Во пренесените делови од нотата не се наведуваат конкретни медиумски објави или постапки на хрватските власти што би ги поткрепиле обвинувањата за мешање во изборната кампања.
