Демократскиот кандидат Скот Колом ја победи републиканската сенаторка Синди Хајд-Смит на изборите за американскиот Сенат во сојузната држава Мисисипи, станувајќи првиот демократ кој освоил сенаторско место во оваа јужна сојузна држава од 1982 година, објави Ројтерс.
Со победата во Мисисипи, демократите обезбедија предност од 55 наспроти 44 места во Сенатот, кој има вкупно 100 места, а сè уште се очекува победникот во една сенаторска трка од минатонеделните избори на Алјаска.
Демократите досега освоиле 41 место во Претставничкиот дом и водат со 254 наспроти 168 места, додека резултатите од уште 13 трки се очекуваат.
Со губењето на контролата врз двата дома на Конгресот, претседателот Доналд Трамп за првпат во двата свои мандата ќе се соочи со Конгрес под контрола на демократите. Тоа ѝ отвора можност на опозицијата да ги блокира законските предлози на неговата администрација и да покренува истраги за нејзината работа.
Скот Колом, окружен обвинител, во текот на кампањата се фокусираше на директниот контакт со гласачите. Во октомвриското интервју за Ројтерс изјави дека гласачите во Мисисипи се чувствуваат изневерени од политиките на Трамп, меѓу другото и поради војната во Иран, која придонесе за растот на цените на горивата.
Синди Хајд-Смит првпат беше избрана во 2018 година, а анкетите редовно ѝ даваа предност.
Трамп победи во Мисисипи во 2024 година со речиси 23 процентни поени разлика, а кон крајот на кампањата лично ја посети државата за да ѝ даде поддршка.
Хајд-Смит во 2023 година ја блокираше номинацијата што тогашниот претседател Џо Бајден ја предложи за именување на Колом за федерален окружен судија во северен Мисисипи, наведувајќи ги неговите ставови за прашањата поврзани со трансродовите лица. Другиот сенатор од Мисисипи, републиканецот Роџер Викер, ја поддржа номинацијата на Колом.
Последниот црн кандидат избран во Сенатот од Мисисипи пред Колом беше Бланш Брус, поранешен роб, кој беше избран на таа функција во 1874 година.
