Студентската листа ќе го продолжи дијалогот со Косово, воден за време на претходната влада, кој вклучува спроведување на Бриселскиот договор за нормализација на односите меѓу Србија и Косово, потпишан со посредство на Европската Унија во 2013 година, вели Илија Срдановиќ, носителот листата што победи на вонредните парламентарни избори во Србија на 25 октомври, во интервју за балканскиот сервис на Радио Слободна Европа(РСЕ).
Во интервјуто Срдановиќ наведува дека новата влада ќе ги почитува меѓународните договори потпишани од владата на Александар Вучиќ. Станува збор за политички договори. Кога станува збор за договори со странски компании за инвестиции во Србија, тие ќе бидат почитувани „доколку се усогласени со правниот систем на Србија и меѓународниte акти“.
Тој исто така вели дека Србија ќе продолжи со европската интеграција, како и дека ќе се направи сè за да им се обезбедат на граѓаните информации за тоа што носи членството во ЕУ.
Срдановиќ го повторува повикот за избегнување на каква било форма на реваншизам во Србија и наведува дека одговорноста за моменталната безбедносна состојба е на Владата во заминување во нејзиниот технички мандат.
Срдановиќ е носител на Студентската листа, врз основа на одлуките на Факултетскиот пленум во Србија. Стратегијата на движењето што произлезе од двегодишни протести против корупцијата и за владеење на правото беше да се воспостави организација без лидер.
По убедливата победа над силите на Александар Вучиќ, кој владееше со земјата 14 години, се поставува прашањето кој ќе биде кандидат на Студентската листа за премиер.
Колегиум.мк пренесува дел од интервјуто:
РСЕ: Како се чувствувате како лидер на листа која нема лидер?
Срдановиќ: Се чувствувам горд на сите наши граѓани кои во Студентската листа најдоа излез од сегашната ситуација во која бевме со години во Србија, изложени на репресивниот и авторитарниот режим на претходната влада и на еден човек кој влезе во политичката историја, кој остави неизбришлива трага на празнина во нашата историја, 15 години. Тој беше 15 години, и натаму е.
РСЕ: Toj iзгуби само сто илјади гласови, но сè уште е релевантна сила во Србија. Дали постои свест дека проблемот, ако може така го наречеме, не е решен?
Срдановиќ: Не, не би можел да се согласам со вас и со вашата изјава. Едноставно, во услови на апсолутно недемократско општество во кое живееме, во апсолутно отсуство на каква било слобода на медиумите, каде што имаше контрола врз сè од страна на режимот што Александар Вучиќ ја имаше во полна мера, во полна сила, добивањето половина милион гласови повеќе значи дека тој немаше ниту 15-20 отсто од гласовите во реални околности, доколку постоеја соодветни услови. Ова е вистинската сила на нашата претходна режимска влада.
РСЕ: Предизвиците се исклучително големи пред силите што ги добија изборите, но прво да се осврнеме на ова. Како да се одговори на стравот од одмазда? Како реагирате на насилството и што направивте во врска со тоа? Сликите што ги видовме за време на упадот во телевизијата Информер се вознемирувачки, ќе се согласите.
Срдановиќ: Би се согласил само со едно нешто. Тоа е дека „Студентска листа – Студентите победуваат“ ја темели својата програма, план и сите свои активности досега, вклучувајќи ги и сите активности на студентската организација, врз темелите на владеењето на правото и почитувањето на Уставот и законот. Секоја од нашите понатамошни активности ќе биде водена од тие темели.
Досега, никој од нас, вклучително и јас, не повикавме на каков било вид реваншизам. Баравме да се почитуваат законот и редот. И во последните неколку дена, а особено вчера, голем број членови на нашата листа и мојата маленкост ги повикавме граѓаните мирно и достоинствено да го поминат овој изборен процес. Настаните што можеа да се видат во и околу прорежимскиот медиум Информер не беа инспирирани, охрабрени и поддржани од Студентската листа. Ние ги поддржуваме законот и редот и сакаме Србија да изгледа така во иднина.
РСЕ: Може ли некој да даде гаранција дека насилство нема да се случи?
Срдановиќ: Во моментов, одговорноста за секаков вид насилство и како тоа може да се спречи е на сегашната влада, која е во технички мандат. Од наша страна, ги покануваме и апелираме до сите граѓани во Србија да се воздржат од секаков вид насилство, да го почитуваат законот и редот. Во моментот кога формално ќе ја преземеме власта во наши раце, одговорноста за настаните во земјата паѓа на нас. Во овој момент, ние имаме моќ на жалба, а моќта на функционирање на системот е на државниот апарат, кој сè уште е под технички мандат на претходната влада.
РСЕ: Дали би биле подготвени да прифатите евентуална кандидатура за премиер? Како носител на листа, се чини логично.
Срдановиќ: Да, но во самиот вовед од разговорот со мене, рековте дека ова е листа без лидер. Можеме да го кажеме следново: за секое кадровско решение ќе биде избран кандидатот за кого заеднички веруваме дека ќе го направи најдоброто во интерес на граѓаните на Србија.
РСЕ: Видовме што се случи на Радиотелевизија Војводина. Вие сте во Нови Сад. Тие се извинија за уредничката политика што ја имаа. Што очекувате да се случи на Радиотелевизија Србија?
Срдановиќ: Морам да кажам дека извинувањето на начинот на кој беше изразено не е доволно за да веруваме дека уредничката политика во иднина ќе биде правилна и во согласност со најдобрите интереси на сите граѓани на Србија.
Потребно е да се создаде средина во која ќе има постојана контрола и надзор врз работата, пред сè на јавниот медиумски сервис. Оваа клучна улога ја игра Регулаторното тело за електронски медиуми, кое мора да почне да ја работи својата работа во согласност со законот, а тоа е следењето на јавните електронски медиуми, што, за жал, недостасува во последните 15 години.
Целото интервју можете да го прочитате на РСЕ.
