Американскиот претседател Доналд Трамп ја советувал новата портпаролка на Белата куќа, Кејти Захарија, да размисли повторно за својата улога откако се најде во центарот на вниманието само една недела по преземањето на функцијата.
„Јас и реков: Мислам дека би било подобро за тебе да бидеш среќна, а не сум сигурен дека некогаш ќе бидеш среќна на оваа работа. Оваа работа воопшто не е лесна“, им рече Трамп на новинарите.
Тој додаде дека искрено ѝ рекол оти, доколку бил на нејзина позиција, ќе ја преиспита одлуката да ја преземе функцијата.
Фокс њуз подоцна објави, повикувајќи се на функционер на Белата куќа, дека Захарија се повлекува од функцијата портпаролка.
Захарија ја одржа својата прва прес-конференција во Белата куќа во вторникот.
Според неа, минатата среда добила повик во врска со можно назначување, а минатиот петок добила понуда да ја наследи Каролин Ливит.
Трамп потоа официјално го објави нејзиното назначување, претставувајќи ја како адвокат.
Сепак, во текот на изминатата недела се покренаа прашања за тоа дали Захарија, која дипломирала на Универзитетот Пепердин во Калифорнија, го положила правосудниот испит.
Во интервју за Фокс њуз што се емитуваше во четвртокот, Захарија призна дека не го положила правосудниот испит.
Промените на таа должност не се нови во администрацијата на Трамп. Ентони Скарамучи, кој беше директор за комуникации во Белата куќа за време на првиот претседателски мандат на Трамп, помина само десет дена на таа позиција.
