Автобус со 57 полски патници и двајца возачи излетал од автопатот М3 во Унгарија, паднал во канал и се превртел. Вкупно 12 полски државјани загинаа, а 47 се повредени во тешката автобуска несреќа што се случила рано утрово на автопатот М3 во источна Унгарија. Патниците се враќале од аџилак во Меѓугорје, Босна и Херцеговина, познато римокатоличко светилиште.
Несреќата се случила околу 1 часот по полноќ во близина на градот Мезекерештеш, околу 140 километри источно од Будимпешта. Автобусот со полска регистрација, кој се движел кон Ниреѓхаза, излетал од коловозот, паднал во канал покрај автопатот и се превртел.
Според унгарските власти, 10 патници се здобиле со тешки повреди, а 37 со полесни повреди. Повредените биле пренесени во болници во Егер, Дебрецен и Мишколц.
Спасувачките екипи имале тешка задача бидејќи дел од патниците останале заробени под превртениот автобус. Возилото тежело околу 24 тони, па на местото бил ангажиран и кран за негово подигнување. До околу 3 часот наутро спасувачите успеале да извлечат 35 лица, додека операцијата за извлекување на останатите продолжила.
Унгарската полиција го привела возачот на автобусот, а првичните информации објавени во унгарските медиуми укажуваат дека можно е да заспал зад воланот. Сепак, точната причина за несреќата допрва треба да биде утврдена со истрагата.
Станува збор за полски туристи од регионот Подкарпатје, кои, според информациите од полските и унгарските власти, се враќале од аџилак во Меѓугорје, Босна и Херцеговина. Таму се собираат верници и аџии од целиот свет, луѓе кои се надеваат дека таму ќе ја продлабочат својата вера, или на потенцијални исцеленија и чуда од Дева Марија. Официјално, Ватикан не го призна Меѓугорје како светилиште, но многу верници од целиот свет продолжуваат да одат на ова место за да и оддадат почит и чест на Дева Марија.
Автобусот патувал кон Полска кога се случила несреќата. Полското Министерство за надворешни работи потврди дека во несреќата загинале полски државјани и дека конзуларните служби се во контакт со унгарските власти.
Полскиот претседател Карол Навроцки изрази сочувство до семејствата на загинатите, додека унгарскиот премиер Петер Маѓар соопшти дека разговарал со полскиот премиер Доналд Туск, му изразил сочувство и дека им се заблагодари на спасувачките екипи кои учествувале во извлекувањето на патниците.
Истрагата продолжува и треба да ги утврди сите околности и причините за несреќата.
