Црногорската полиција го бара рускиот државјанин Михаил Николаевич Шабунин (30) под сомнение дека претходно во понеделникот во близина на Даниловград убил тројца инструктори од стрелачки клуб, објави агенцијата Бета.
Користејќи огнено оружје на стрелиштето „Чешка зброевка“, убиени се П.Г. (24) и Н.К. (20) од Подгорица и М.Р. (67) од Даниловград, соопшти црногорската полиција.
Полицијата ги повикува граѓаните да бидат претпазливи и да останат дома, со оглед на тоа што осомничениот е вооружен.
„Силни полициски сили – Специјалната полициска единица и Специјалните полициски единици – се распоредени за да го пронајдат сторителот. Во неколку градови е воспоставена блокада на потесното и поширокото подрачје“, пишува во соопштението.
Црногорски медиуми, повикувајќи се на полициски извори, наведуваат дека убиените мажи биле вработени инструктори од клубот „Чешка зброевка“, и дека осомничениот изнајмил оружје на стрелиштето.
Тројното убиство е пријавено во полицијата од сопственикот на клубот.
