Силен земјотрес во саботата (27 јуни) го погоди регионот Хиндукуш во Авганистан, соопшти Европско-медитеранскиот сеизмолошки центар, при што беа регистрирани потреси што се чувствуваа од главниот град Кабул, па сè до соседен Пакистан.
Луѓето во паника излегуваа од своите домови во округот Сват, во северната пакистанска покраина Хајбер Пахтунхва, изјави жителот Данијал Ахмад за новинската агенција „Ројтерс“.
Земјотресот со јачина од 6 степени бил на длабочина од 100 километри (62 милји), соопшти Европско-медитеранскиот сеизмолошки центар (EMSC).
Потресите беа почувствувани во Исламабад, како и во источната покраина Пенџаб и северозападната покраина Хајбер Пахтунхва, која граничи со Авганистан. Тие беа почувствувани и во Кашмир под пакистанска администрација – пишува новинската агенција АП.
Службите за итни случаи во Хајбер Пахтунхва соопштија дека се ставени во состојба на готовност.
Портпаролот на Провинциската управа за управување со катастрофи, Анвар Шахзад, изјави дека првичните проценки не покажале извештаи за жртви или материјална штета.
