Претставници на Европската Унија соопштија дека Европејците можат да очекуваат цените на нафтата и гасот да останат над нивото пред војната во Иран барем до крајот на 2027 година. Цените на другите стоки исто така ќе следат нагорна линија, пренесува агенцијата Асошиејтед Прес.
Комесарот за економија на ЕУ, Валдис Домбровскис, деновиве изјави дека повисоките цени на енергијата се првенствено одговорни за зголемувањето на инфлацијата до прогнозите од 3,1% за оваа година и 2,4% за 2027 година. Тоа е значително повисоко од претходната прогноза за оваа година од 1,9%.
„Очекуваме дека оваа инфлација на енергија постепено ќе се спушти и во различни сектори на економијата“, изјави Домбровскис по состанокот на министрите за финансии на 21-члената еврозона, кои ја сочинуваат Еврогрупата.
Претседателката на Европската централна банка, Кристин Лагард, вели дека дури и ако конфликтот на Блискиот Исток заврши сега, „задоцнетите ефекти“ ќе ги одржат цените на стоките високи.
„И веројатно е факт дека нивото на цените ќе биде повисоко на крајот од оваа криза, кога ќе го видиме крајот на кризата“, изјави Лагард.
Додаде дека ЕЦБ ќе ги преземе „сите потребни мерки“ за да ја одржи стабилноста на цените на 2%, обрнувајќи посебно внимание на последиците од почетниот економски шок предизвикан од зголемувањето на цената на енергијата.
Иако проекциите за повисока инфлација доведоа до предвидувања дека ЕЦБ ќе ги зголеми своите каматни стапки за борба против инфлацијата, Лагард не понуди никакви индикации за тоа како ќе дејствува банката.
„Ќе продолжиме да следиме пристап зависен од податоци и состанок по состанок, со цел да ја утврдиме најсоодветната позиција на монетарната политика со цел да ја исполниме нашата среднорочна цел од 2%“, рече Лагард.
Кирјакос Перкакис, претседател на Еврогрупата, смета дека за ЕУ, крајот на кризата би значело враќање кон слободна пловидба без наметнување на какви било патарини низ Ормускиот Теснец, од каде што минува околу една петтина од светската нафта и гас.
Тој потврди дека економскиот раст во рамките на еврозоната ќе достигне 0,9% оваа година и 1,2% во 2027 година, што е пониско од претходната прогноза, „но очигледно далеку од сценарио за рецесија“.
Цените на нафтата нагло пораснаа откако ризикот од напади со ирански беспилотни летала и глисери го затвори поголемиот дел од бродскиот сообраќај низ Ормускиот Теснец, морскиот премин за околу една петтина од светската нафта и природен гас.
Покрај тоа, веста за војната ја разниша довербата на потрошувачите, која падна на 40-месечно најниско ниво поради растечките стравувања од губење на работни места и повисока инфлација.
