Четири нови лица се осомничени во истрагата за нелегалните ботокси, а меѓу нив се и двајца доктори.
Станува збор за група, која од Основното јавно обвинителство за гонење организиран криминал и корупција, ја сомничат дека е инволвирана во нелегален увоз, дистрибуција и апликација на медицински лекови и медицински помагала.
Во рамки на проширувањето на истрагата, кое дошло до четворица нови осомничени, биле правени претреси на пет локации во Скопје, меѓу нив и на две здравствени установи.
„Врз основа на прибраниот доказен материјал, јавниот обвинител донесе Наредба за спроведување истражна постапка против четири лица. Тројца осомничени се товарат за кривичните дела ‘злосторничко здружување’ и ‘повреда на права од индустриска сопственост и неовластена употреба на туѓа фирма’, додека едно лице е осомничено за кривичното дело ‘повреда на права од индустриска сопственост и неовластена употреба на туѓа фирма’“, велат од Обвинителството.
На четворицата нови осомничени им се определени мерки за претпазливост.
Овој случај беше оформен во април кога беа осомничени вкупно 17 лица и шест фирми од Скопје и Битола. Меѓу осомничените има доктори од болницата „8 Септември“ и од Универзитетската клиника за дерматологија – Скопје, како и сопственици на приватни дерматолошки ординации и лица кои организирале транспорт и дистрибуција на нелегални лекови и медицински помагала.
Обвинителството вели дека ја продолжува истрагата и понатаму за да ги расчисти сите околности и евентуално да утврди дали се инволвирани и други лица.
