Американските царини за стоки од Србија се привремено укинати од петок 24 јули, а претходната стапка од 35 проценти е намалена на нула, изјави српскиот претседател Александар Вучиќ за Радио Телевизија Србија (РТС). Претседателот најави пониски цени на лековите почнувајќи од 1 август, финансиска помош за пензионерите од септември, а вети и дека сите возрасни граѓани ќе добијат пари од Фондот на акционери.
„Во одреден момент, намалувањето на американските царини ќе биде од 10 до 12 проценти, но почнувајќи од вечерва – и за некое време што доаѓа – ќе биде нула проценти“, потврди Вучиќ.
Тој нагласува дека е многу среќен поради оваа вест, бидејќи, како што вели, ќе има повеќе инвестиции и, со тоа, подобар инвестициски рејтинг за Србија. Потсети дека за време на посетата на Јапонија разговарал со претставници на јапонски компании, кои ги навеле високите американски тарифи како една од главните пречки за нови инвестиции во Србија.
Вучиќ процени дека новата одлука може да донесе „буквално стотици милиони долари нови инвестиции“, наведувајќи дека очекува нови инвестиции од компаниите што веќе работат во Србија, но и дека тоа ќе биде силен сигнал за други јапонски, корејски и други странски инвеститори.
Објаснувајќи ја постапката на Министерството за финансии на САД, Вучиќ рече дека се анализирани четири области.
„Првата се однесуваше на таканаречената принудна работа, врз основа на која сите земји од Европската Унија добија дополнителни царини од 10 проценти. Втората област беа неповолните трговски практики, а Србија беше отстранета од таа листа по анализата. Третата се однесуваше на фармацевтската индустрија и високите цени на лековите, со фокус првенствено на Германија и Швајцарија, додека Србија не беше вклучена. Четвртата област се однесуваше на неповолните практики во областа на дигиталните даноци, каде што Србија исто така не е предмет на мерки на САД“, објасни српскиот претседател.
Во меѓувреме пак, најновите американски царини за шеесетина земји воведени од претседателот Доналд Трамп веднаш предизвикаа приговори од трговските партнери како што се Кина, Јапонија и Австралија, а австралискиот министер за трговија ги нарече „целосно неоправдани“.
Администрацијата на Трамп воведе царини од 10 до 12,5 проценти наводно затоа што тие земји не ја спроведувале соодветно забраната за продажба на производи изработени со принудна работа.
Царините стапија во сила откако претходните привремени царини од 10 проценти истекоа на полноќ, а беа воведени како замена на огромните такси што беа поништени од Врховниот суд на САД.
