Берлинскиот процес ја докажа својата вредност со приближувањето на Западен Балкан кон Европската Унија (ЕУ) и зајакнувањето на регионалната соработка, порачаа германскиот канцелар Фридрих Мерц и австрискиот канцелар Кристијан Штокер на самитот во Милочер, во близина на Будва, Црна Гора.
Берлинскиот процес беше започнат во 2014 година на иницијатива на Германија, како меѓувладина платформа за забрзување на европската интеграција на Албанија, Босна и Херцеговина, Црна Гора, Косово, Северна Македонија и Србија, како и за зајакнување на соработката во регионот.
На прес-конференцијата по самитот, Мерц ја поддржа интеграцијата на земјите од Западен Балкан во ЕУ, оценувајќи ја како „геополитички императив“. Истовремено, нагласи дека земјите од регионот мора да покажат политичка волја за спроведување реформи.
„Храбрите реформи, особено оние што се однесуваат на владеењето на правото, се задолжителен предуслов за каков било напредок“, рече Мерц.
Тој предупреди дека Западен Балкан не смее да стане простор во кој големите сили ќе се натпреваруваат за влијание, туку треба да продолжи по патот кон Европската Унија.
„Денес тоа е геополитички императив. Западен Балкан не смее да стане место каде што големите сили се натпреваруваат за влијание. Во наш заеднички интерес е патот на земјите од регионот неповратно да води кон Европската Унија“, изјави германскиот канцелар.
Како дополнителен аргумент за итноста на процесот ја посочи руската агресија врз Украина.
