Израелската армија се наоѓа во состојба на зголемено ниво на готовност по наредба на министерот за одбрана Израел Кац, на денот на одбележување на 3-годишнината од нападот што го изведе Хамас на 7 октомври 2023 година.
Кац ги издаде овие упатства „во светло на разузнавачките информации за намерите на Хамас да се обиде да ги нападне и гранатира нашите сили“, се наведува во соопштението на неговото министерство.
„Ако нашите сили претрпат загуби, Хамас и жителите на Газа ќе платат висока цена, и тоа во значителни размери“, додаде министерството.
Заканата беше упатена во услови на зголемени тензии во пресрет на третата годишнина од дотогаш невидениот напад врз израелска територија што Хамас го изврши пред три години. Нападот предизвика разорна израелска одмазда во која беше опустошен Појасот Газа.
Израелските власти стравуваат од заседи врз израелските воени позиции во деловите од Појасот Газа што ги контролира армијата, како и од киднапирање војници.
Армијата во последните месеци повеќепати ја предупредуваше владата за обидите на Хамас повторно да ги изгради своите капацитети.
Во нападот на Хамас загинаа над 1.200 луѓе, во израелската одмазда 74.000
На официјалната церемонија во понеделникот во Ерусалим, по повод одбележувањето на нападот од 7 октомври, премиерот Бенјамин Нетанјаху изјави дека Хамас никогаш веќе нема да има „никаква власт“ во Појасот Газа.
Според податоците на АФП, засновани врз официјални извештаи, во нападот на 7 октомври биле убиени 1.221 лице, повеќето цивили.
Уште 251 лице биле киднапирани и однесени во Газа од страна на палестинското исламистичко движење.
Во израелската офанзива што следеше како одмазда во Газа, според податоците на Министерството за здравство под контрола на Хамас, биле убиени повеќе од 74.200 луѓе.
ОН ги сметаат овие податоци за веродостојни.
Гутереш: Овие ужаси не смеат да се повторат
Генералниот секретар на ОН Антонио Гутереш деновиве повика на мирна иднина за Израелците и Палестинците, во пресрет на третата годишнина од нападот на Хамас врз Израел.
„Нека оваа годишнина не биде само уште една година на жалост, туку и знак на обновена решеност да се изгради поинаква иднина“, рече Гутереш во Њујорк.
Тој истакна дека Израелците и Палестинците треба да можат да живеат едни покрај други во мир и безбедност, со остварување на своите права, достоинство и стремежи.
„Овие ужаси никогаш не смеат да се повторат“, нагласи генералниот секретар на ОН.
Прекинот на огнот е во сила од октомври 2025 година, но смртоносните напади продолжуваат.
Односите меѓу израелската влада и Обединетите нации и натаму се многу тензични.
Израел го обвинува Гутереш за пристрасност, додека шефот на ОН повеќепати го критикуваше постапувањето на Израел во Газа.
Гутереш им оддаде почит и на жртвите на нападот од 7 октомври.
„Ништо не може да ги оправда овие злосторства. Нивното страдање и трајната болка на нивните семејства никогаш не смеат да бидат заборавени“, рече тој.
Шефот на ОН исто така го истакна страдањето на Палестинците во Газа по избувнувањето на војната.
„И нивното страдање мора веднаш да престане“, рече тој.
Гутереш изјави дека прекинот на огнот донел одредено олеснување, но сè уште не донел безбедност, соодветна хуманитарна помош и веродостоен пат кон обновување и мир.
Тој ги повика сите страни целосно да ги исполнат своите обврски и да преминат во следната фаза од прекинот на огнот.
„Време е прекинот на огнот да стане траен. Време е да се овозможи доставување хуманитарна помош во голем обем. И време е да се почитува меѓународното право“, рече тој.
Гутереш истакна дека мора да се изгради политички пат кон траен мир во целиот регион.
