Танкер под санкции на Сoединетите Држави помина низ Ормускиот теснец и покрај блокадата на САД на таа клучна морска рута, објави новинската агенција Ројтерс повикувајќи се на податоците за сообраќајот на бродови на компанијата LSEG.
Танкерот Рич Стари е во сопственост на Кина и има кинески екипаж, а транспортира околу 250 илјади барели метанол.
Соединетите Држави претходно воведоа санкции врз овој танкер и неговиот сопственик, Шангај Сјуанрун Шипинг Ко Лтд, поради неговите деловни зделки со Иран.
Воената блокада на целиот сообраќај што влегува и излегува од иранските пристаништа од страна на СAД почна на 13 април, откако претходно пропаднаа мировните преговори во Пакистан за време на викендот.
Иран се закани со одмазда
Ебрахим Резаи, портпарол на Комисијата за национална безбедност на иранскиот парламент, ја отфрли заканата од САД за блокада како „повеќе блефирање отколку реалност“.
„Тоа ќе ја направи сегашната ситуација покомплицирана и ќе го направи пазарот потурбулентен“, напиша тој во објава на социјалната платформа X.
Претседателот на иранскиот парламент, Мохамед Багер Калибаф, му се обрати на Трамп во изјава: „Ако се борите, и ние ќе се бориме“.
Во меѓувреме, претставникот на Иран во Обединетите нации, Амир-Саид Иравани, побара отштета од пет земји од Блискиот Исток – Бахреин, Саудиска Арабија, Катар, Јордан и Обединетите Арапски Емирати – за кои Иран вели дека го прекршиле меѓународното право помагајќи ги воените напори против нив, објавија државните медиуми на Исламската Република.
Уште еден обид на Трамп да го натера Иран на отстапки
Американскиот претседател Доналд Трамп објави дека иранската морнарица е „целосно уништена“ и додаде дека ќе уништи и помали бродови ако се приближат до американската блокада на иранскиот брег.
Овој потег е негов најнов обид да го принуди Иран да направи отстапки, вклучително и обврска да не бара нуклеарно оружје или средства за негова изградба.
Меѓудругото, поморската блокада на САД доаѓа по повеќе од еден месец воздушни напади и продолжени економски санкции.
Вашингтон има значајни поморски и воздухопловни сили во регионот кои би можеле да спроведат блокада. Според некои аналитичари, ова би значело промена од спроведување воздушни напади кон пресретнување цивилни бродови.
Обидот да се стори тоа од или во близина на Ормутскиот теснец, тесен воден пат низ кој минува иранскиот поморски извоз, би можел да ги загрози американските поморски средства од напад од ирански беспилотни летала, ракети или мали брзи борбени летала.
Неколку недели американски и израелски воздушни напади сериозно ги ослабнаа капацитетите на Иран, но моќниот Корпус на Исламската револуционерна гарда (ИРГЦ) има свои поморски единици составени од овие мали бродови, кои продолжија да напаѓаат бродови во Персискиот Залив.
„Доколку некој од овие бродови се приближи до нашата БЛОКАДА, тие веднаш ќе бидат елиминирани“, напиша Трамп на социјалните мрежи кратко по стапувањето во сила на блокадата.
Ризиците би можеле да се минимизираат
Со оглед на тоа што, на пример, околу 90 проценти од пратките на нафта на Иран одат во Кина, американските сили би можеле да седат настрана и да ја следат блокадата од далечина каде што би биле помалку ранливи.
Одлуката за таргетирање на бродови поврзани со Иран има јасна економска логика, која е наведена во неодамнешната политика на САД.
„Приходите од нафта од Кина сочинуваат околу 45 проценти од државниот буџет на Иран“,пишува во соопштението на Конгресот на САД од 16 март.
Во последните недели, речиси целосното затворање на Ормускиот теснец од страна на Иран за сите освен за неговите бродови е опишано како задушување на светската економија, отсекувајќи ја од нафта, гас и други клучни стоки.
Економски и дипломатски последици од блокадата
Блокадата на САД има за цел да ја задуши економијата на Иран, која продолжи да има корист од извозот на нафта и покрај војната што започна со воздушните напади на САД и Израел на 28 февруари.
Блокадата може да има и големи дипломатски последици.
Не е јасно дали бродовите со кинеско знаме ги посетуваат иранските пристаништа. Историски гледано, флотите на ‘рѓосани танкери за нафта што ги користат Иран, Русија и Венецуела најчесто ги вееле знамињата на земји како Сиера Леоне, Габон или Маршалските Острови. Тие веројатно би биле цел на американските мерки.
Сепак, претходните коментари на Трамп сугерираа дека блокадата ќе се прошири и на бродовите што плаќаат патарина на Иран за премин низ Ормускиот теснец.
Исто така, вреди да се напомене дека во изјавата на Централната команда за блокадата се наведува дека таа ќе се однесува на бродовите што влегуваат во „крајбрежните области“ на Иран. Ова би ја вклучило рутата што ја поминале многу бродови што досега поминале низ теснецот со дозвола на Техеран.
Во секој случај, запленувањето на брод под кинеско знаме од страна на американската морнарица би можело да предизвика големи дипломатски тензии токму кога се очекува Трамп да го посети Пекинг на состанок со кинескиот лидер Си Џинпинг следниот месец.
Економски, иако Кина се потпира на Иран за снабдување со нафта, би можела да биде заштитена од непосреден удар од големите резерви на нафта што ги акумулирала пред почетокот на сегашниот конфликт. Покрај ова упатените велат дека таа е во можност да користи релативно големи количини иранска нафта на море, од кои голем дел веќе е покрај кинескиот брег.
