Binance, најголемата светска берза за криптовалути, синоќа потврди дека во хакерски напад биле украдени дигитални средства во вредност од 6,3 милијарди долари. Овој инцидент се опишува како „најголемиот грабеж во историјата“, пренесува BBC.
Компанијата соопшти дека, со помош на партнерски платформи, успеала да замрзне приближно половина од таа сума, додавајќи дека ќе ги „покрие сите настанати загуби“.
Првичните внатрешни проверки укажуваат на тоа дека пробивот веројатно потекнува од компромитиран лаптоп на еден од нивните инженери, што му овозможило на напаѓачот неовластено да повлече огромни суми пари.
Компанијата за истражување на сајбер-безбедноста TRM Labs, која во своите истраги користи вештачка интелигенција, го припишува овој напад на севернокорејската хакерска група „TraderTraitor“.
„До оваа проценка дојдовме со висок степен на сигурност“, наведува TRM Labs во својот извештај, додавајќи дека неколку елементи од нападот целосно се совпаѓаат со претходни операции поврзани со режимот во Пјонгјанг, вклучително и случајот со Bybit.
Ари Редборд, главен аналитичар во TRM Labs, изјави за BBC дека напаѓачот сè уште располага со огромна сума украдени пари, што значи дека потрагата по средствата всушност допрва започнува.
Овој напад далеку го надминува претходниот рекорд – грабежот од 2025 година насочен кон берзата Bybit, кога беа украдени 1,5 милијарди долари.
