Деца во руски православен воено-патриотски камп наводно биле тепани и подложени на други физички казни, што предизвика кривична истрага и контрола на организацијата која добила милиони рубли во државни грантови, открива рускиот сервис на Радио Слободна Европа.
Кампот „Богатирска застава“ (Херојска стража) во близина на сибирскиот град Омск добил околу 60.000 долари од рускиот Претседателски фонд за грантови оваа година. Работи во соработка со Омската епархија на Руската православна црква и ултранационалистичката група наречена Руска заедница.
Тврдењата се појавија откако едно 11-годишно момче се вратило од 12-дневна сесија во кампот во јули со модринки по целото тело и му била дијагностицирана компресивна фрактура на ‘рбетот, според објавата на неговата мајка на социјалните мрежи.
Олга Белко вели дека нејзиниот син бил постојано тепан од три постари момчиња и се плашела да се жали бидејќи насилството се влошило откако првично побарал помош.
„Тој бил систематски тепан секоја втора ноќ“, напиша таа.
Белко тврди дека нејзиниот син постојано се жалел на болки во грбот кај медицинскиот персонал во кампот и кај командантот на неговата единица, но дека ништо не било преземено.
Семеен пријател за рускиот сервис на РСЕ изјави дека возрасните во кампот, исто така, учествувале во казнувањата.
„Му истуриле течен сапун во устата. Тој повраќал со часови“, рече пријателката под услов да остане анонимна поради безбедносни причини.
Таа, исто така, тврдела дека еден командант, фрустриран од поплаките на момчето, го фрлил преку рамо а потоа на земја.
РСЕ не може независно да ги потврди овие извештаи за злоупотреба.
Истражниот комитет во регионот Омск отвори кривична постапка за „незаконски дејствија против малолетник“. Властите не објавија никакви обвиненија. Откако приказната на момчето стана јавна, неколку други родители излегоа со слични тврдења.
Две семејства изјавија дека нивните деца биле тепани или подложени на други физички казни во кампот во 2024 и 2025 година.
Нивните искази содржат слични детали, вклучувајќи удирање со тупаници во градите, течен сапун што се истура во устата на децата и постари деца кои ги напаѓаат помладите додека возрасниот персонал не интервенирал.
Една жена за РСЕ изјави дека нејзиниот десетгодишен син се вратил од кампот во 2024 година со голема модринка на грбот, а подоцна признал дека постари момчиња го тепале.
Мајката вели дека на децата им било кажано дека таквиот третман претставува „воени традиции“ и дека треба да се навикнат на тоа затоа што „кога ќе пораснете, ќе бидете војник“.
„Богатирска Застава“ работи речиси две децении и вели дека повеќе од 4.800 деца го посетувале кампот во текот на изминатите 19 години.
Неговата тековна програма вклучува воена обука, борба гради в гради, фрлање ножеви, камуфлажа, радио комуникации, беспилотни летала, патеки со пречки и маршеви.
Кампот вели дека неговата цел е „да ги воспита идните воини-бранители на татковината“.
Омската епархија ја опиша „Богатирска Застава“ како епархиски воено-патриотски детски камп кој работи под нејзино покровителство. Организаторите на кампот продолжија да го фалат проектот и покрај обвинувањата.
Во објава од 13 август, кампот соопшти дека неговата сезона во 2026 година поминала „едноставно прекрасно“.
Руската заедница, ултранационалистичката група, исто така го бранеше кампот, опишувајќи го медиумското известување за обвинувањата како напад од страна на проукраинските сили. Исто така, го обвини повреденото момче за провокативно однесување.
Кампот го водат Иља и Јелена Чешегоров. Во едно интервју од 2024 година, тие рекоа дека физичката и основната воена обука станале фокус на кампот.
Кампот се соочил со безбедносни проблеми во 2010 година, кога 14-годишно момче претрпело компресивни фрактури на пет пршлени. Во 2016 година, властите привремено ја суспендираа работата на кампот поради бројни санитарни и безбедносни прекршувања.
