Калифорнија и уште шест американски сојузни држави поднесоа тужба против администрацијата на претседателот Доналд Трамп, обвинувајќи ја за задржување на средства што ги одобрил Конгресот, меѓу кои и околу 810 милиони долари што Белата куќа се обиде да ги поништи пред крајот на фискалната година.
Трамп минатата недела се обиде еднострано да ги задржи средствата што Конгресот ги одобрил за финансирање на имиграцијата, расните прашања и образованието.
Тужбата претставува нов правен спор околу границите на претседателските овластувања кога станува збор за трошењето на јавните средства.
Потегот на Трамп да побара од Конгресот да го ускрати финансирањето толку блиску до крајот на фискалната година, со што законодавците би немале доволно време да реагираат, предизвика критики од двете партии.
Критичарите го опишаа како обид да се заобиколи уставната надлежност на Конгресот за одлучување за федералните трошоци.
Во тужбата поднесена пред федералниот окружен суд во Калифорнија, предводена од калифорнискиот јавен обвинител Роб Бонта, се тврди дека одбивањето на администрацијата да ги потроши однапред одобрените средства ја нарушува уставната поделба на власта, како и други одредби од Уставот.
Уставот му ги гарантира на Конгресот овластувањата за одобрување и трошење на јавните средства, но Белата куќа минатата недела соопшти дека програмите што се финансираат со тие средства поттикнуваат нелегална имиграција, расни тензии и непотребен страв поврзан со животната средина.
Сојузните држави, пак, во тужбата тврдат дека напорите на администрацијата на Трамп за задржување на федералните средства ги поткопуваат исклучивите овластувања на Конгресот за управување со федералниот буџет.
