Пентагон во петокот објави она што го нарече „нови, досега невидени“ досиеја за НЛО, поздравувајќи го чекорот како пример за посветеноста на одделот во насока на транспарентност, објави Њујорк тајмс.
„Ниту еден друг претседател или администрација во историјата не спровеле вакво ниво на транспарентност за НЛО,“ се наведува во соопштението на Пентагон, повикувајќи се на она што Министерството за одбрана го нарекува „неидентификувани невообичаени феномени“ (U.A.P.), а што повеќето луѓе го нарекуваат НЛО, односно „неидентификувани летечки објекти“.
„Колекцијата“, според соопштението, е на линкот на Пентагон war.gov/ufo, а досиејата ќе се објавуваат постепено.
Првичните досиеја се нејасни статични слики кои можат да претставуваат било што. На една од нив се гледа група точки на екранот. На друга има чудно обликувани објекти.
Претседателот Трамп на социјалните мрежи ја претстави објавата како исполнување на ветување кон јавноста.
„Додека претходните администрации не успеаја да бидат транспарентни за оваа тема, со овие нови документи и видеа, народот може сам да одлучи, ‘ШТО ПО ЃАВОЛИТЕ СЕ СЛУЧУВА?’“, пренесоа светските новински агенции.
Во последниве години во САД повторно се зголеми јавниот интерес за вонземскиот живот. Во 2022 година, Конгресот ги одржа првите сослушувања за НЛО по 50 години, а војската вети поголема транспарентност за ова прашање.
161 досиеја се достапни на веб-страницата на Министерството за одбрана, а уште повеќе ќе бидат објавени.
Објавата на досиејата во петок доаѓа откако поранешниот претседател Обама предизвика дополнителен интерес кога во интервју во февруари рече дека вонземјаните се „реални, но јас не сум ги видел“, објави Би-Би-Си.
Транскрипти, мисии, феномени…
Досиејата содржат претходно класифицирани транскрипти од астронаутите на мисиите Аполо 11, Аполо 12 и Аполо 17 за слетување на Месечината во 1960-тите и 1970-тите години.
Баз Олдрин, познатиот астронаут од мисијата Apollo 11, во интервју од 1969 година објавено во петок изјавил дека видел неколку необјасниви феномени за време на неговото патување на Месечината.
„Забележав нешто што изгледаше како прилично светол извор на светлина, кој ние привремено го припишавме на можен ласер,“ рекол тој, пренесе Би-Би-Си.
Објавен е и транскрипт од комуникацијата меѓу операторите на мисијата Аполо 17 за непознатиот феномен:
- „Сега имаме неколку многу светли честички или фрагменти или нешто што поминува покрај нас додека маневрираме“, му рекол еден оператор на командниот центар.
- „Разбрав“, одговорил центарот.
- „Има цела група големи објекти долу на мојот прозорец – тие се многу светли. Низ прозорецот на Рон изгледа како огномет“, додаде друг оператор.
- „Да. Сега можете да ја видите и нивната форма. Тие се многу назабени, аголни, ротирачки фрагменти“, рекол првиот оператор.
НЛО или напредна воена технологија?
Американски претставници истакнуваат дека дел од пријавените случаи можеби не се поврзани со вонземски појави, туку со напредни воени технологии или други објаснувања што сè уште се истражуваат. Иако објавата повторно ги разгоре јавните дебати и шпекулации за вонземски живот, официјалните служби нагласуваат дека целта е поголема транспарентност и отворање на досега класифицирани информации кон јавноста, пренесоа американските медиуми.
Со потврда излезе и администрацијата на претседателот Трамп од Белата куќа.
„Најновите видеа, фотографии и оригинални документи за неидентификувани аномални феномени од целата влада на Соединетите Американски Држави сега се на едно место – без потреба од безбедносна дозвола. Додека претходните администрации се обидуваа да го дискредитираат или обесхрабрат американскиот народ, претседателот Трамп е фокусиран на обезбедување максимална транспарентност за јавноста, која на крајот може да извлече свои заклучоци за информациите содржани во овие датотеки“, изјавија од Белата куќа за Фокс њуз.
