Американскиот претседател Доналд Трамп во четвртокот го преименува Езерото Онтарио во „Езеро Америка“, со што го ескалираше спорот со Канада кој веќе предизвика царини за прекугранична трговија вредна десетици милијарди долари. Извршната наредба на Трамп за Езерото Онтарио, едно од петте Големи Езера во Северна Америка, се однесува на американската федерална употреба на името и не одредува како Канада, меѓународните тела или други организации ќе го нарекуваат езерото.
Во рок од неколку часа по изјавата на Трамп, премиерот на Канада и демократската гувернерка на сојузната држава Њујорк изјавија дека нема да го менуваат името, кое е старо повеќе од 400 години. Државата Њујорк граничи со езерото од американска страна.
„Ефективно веднаш, ќе го промениме името на Езерото Онтарио во Езеро Америка“, им изјави Трамп на новинарите во Овалната соба.
„Промената на името во Езеро Америка е нешто за кое размислував подолго време,“додаде тој.
Трговските преговори меѓу САД и Канада пропаднаа минатата недела, при што двете страни меѓусебно обвинуваат за прекинување на тридневните интензивни преговори. Соочувајќи се со најниската јавна поддршка во неговиот мандат, Трамп кој водеше кампања со ветување дека ќе избегне започнување нови странски војни и ќе се бори против инфлацијата се мачи да ги реши и трговската војна што неговата администрација ја започна со Отава, и војната што САД и Израел ја започнаа против Иран пред шест месеци. Двата конфликти имаат улога во зголемувањето на трошоците за живот на Американците.
„Америка се менува“
Канадскиот премиер Марк Карни изјави дека името на езерото постоело уште пред Канада и САД да станат нации.
„Знаеме дека Америка се менува. Нивните трговски односи, нивната надворешна политика, нивните национални споменици, нивните хидроними“, напиша Карни на социјалните мрежи. „Канаѓаните исто така знаат дека именувањето на реалноста значи дека тоа се вика Езеро Онтарио тогаш, сега и засекогаш.“
Околу 52% од површината на Езерото Онтарио се наоѓа во Канада, а остатокот е во Њујорк.
Гувернерката на Њујорк, Кети Хокул, одговори кусо на социјалните мрежи.
„Њујорк нема да го нарекува така“, посочи таа.
Републиканскиот гувернер на Вермонт (сојузна држава која граничи со Канада и Њујорк), Фил Скот во четвртокот на социјалната мрежа Икс (X) ја нарече одлуката на Трамп „ситничарска и разочарувачка“.
Великиот поглавар Пјер Пикар од нацијата Вендат во Квебек издаде соопштение во кое ја осуди промената на името, кое потекнува од јазикот вендат и значи „езерото е убаво, големо“.
„Претседателот Трамп се обидува да ја избрише нашата историја“, рече тој.
„Огорчен, запрепастен, шокиран, немам други зборови со кои можам да го искажам тоа што го чувствувам по одлуката на претседателот Трамп да го преименува Езерото Онтарио во ‘Езеро Америка’.“
„Сè што ни треба е океан“
Трамп во четвртокот исто така навести дека би размислил за преименување и на океаните.
„Имаме залив и имаме езеро, сега сè што ни треба е океан, па можеби ќе мора да го промениме името на Атлантскиот и/или Тихиот Океан. Можеби ќе ги промениме двата“, им рече Трамп на новинарите.
Од почетокот на 2025 година, Трамп повеќепати ја провоцираше Канада да стане 51-та американска сојузна држава, идеја што канадските лидери ја отфрлија како апсурдна. Овој потег тешко дека ќе ги олесни идните трговски преговори меѓу САД и Канада, бидејќи повеќето Канаѓани го доживуваат како непотребно провокативен и навредлив.
Карни изјави дека трговските преговори пропаднале поради повеќе прашања, вклучувајќи ги американските предлози со кои се доведуваат во опасност правилата за францускиот јазик во Канада, прашањето дали олеснувањето на американските царини ќе важи за средни или тешки камиони, како и барањата да се ограничи можноста на Канада да склопува нови трговски договори. Американските официјални лица ја отфрлаат ваквата карактеризација, велејќи дека одлуката на Карни да го одбие договорот била политички избор.
Откако се врати на функцијата минатата година, Трамп исто така се обидува да го стави своето име на згради и други симболи на американската моќ, вклучувајќи истакнати згради во Вашингтон, планирана класа на воени бродови на Морнарицата, визна програма за богати странци, владин веб-сајт за лекови на рецепт и федерални штедни сметки за деца. Трамп исто така нареди Мексиканскиот Залив да се преименува во „Американски Залив“ во јануари 2025 година. Потоа беа потребни околу две недели Американскиот одбор за географски имиња, како дел од Министерството за внатрешни работи, да ја ажурира официјалната федерална номенклатура во Информацискиот систем за географски имиња за да ги одрази промените, кои стапија на сила веднаш за федерална употреба.
Анкетата на Ројтерс/Ипсос во мај покажа дека 72% од Американците имаат позитивно мислење за Канада — повисок процент од која било друга земја во анкетата (вклучително и Германија и Мексико) и речиси двојно повеќе од рејтингот на самиот Трамп.
