Американскиот претседател Доналд Трамп изјави дека ќе „направи што мора да направи“ ако Иран не го почитува договорот со Вашингтон.
„Ако Иран не го почитува договорот или ако не се однесува пристојно, јас ќе го направам она што морам да го направам, изјави Трамп пред новинарите.
Минатата недела, Трамп и иранскиот претседател Масуд Пезешкијан потпишаа привремен договор меѓу САД и Иран. Договорот дојде повеќе од три месеци откако САД и Израел го нападнаа Иран, а Иран одговори со свои напади врз Израел и земјите од Заливот со американски бази.
Трамп додаде дека Иран треба да ги користи незамрзнатите пари за да купува храна исклучиво од САД.
„Сите тие пари се враќаат во форма на купување храна што им е очајно потребна. Имаат 91 милион луѓе, не можат да ги прехранат. Затоа, парите што ги собираме ќе одат кај нашите земјоделци“, изјави Трамп.
Трамп, исто така, тврди дека Ормускиот теснец е „целосно отворен“.
Главниот преговарач на Иран, Мохамад Бакер Калибаф, во понеделник изјави дека Техеран се согласил да воспостави комуникациска линија во врска со преминувањето на бродовите низ Ормускиот Теснец за да се избегнат конфликти и инциденти во стратешкиот воден пат.
По враќањето од неделните разговори со САД во Швајцарија, иранскиот преговарач додаде дека ослободувањето на 12 милијарди долари замрзнати ирански средства е финализирано во разговорите.
Нападите на САД и Израел врз Иран и израелските напади во Либан убија илјадници, а милиони раселија.
Војната во Иран, исто така, ги потресе пазарите низ целиот свет и ги зголеми глобалните цени на нафтата.
