Затворањето фабрики и масовните отпуштања се повод за денешните масовни протести на десетици илјади работници во германската автомобилска индустрија низ целата земја.
Под слоганот „Иднина наместо кратења – солидарноста е нашиот најсилен бренд“, протестите се одржуваат пред фабриките на Фолксваген, Мерцедес-Бенц, БМВ, Ауди, Порше и компании добавувачи за автомобилската индустрија.
Моќниот Синдикат „ИГ Метал“ најави повеќе од 280 протестни собири, со порака дека работниците не се виновни и не треба тие да плаќаат за грешките направени во изминатите години.
Протестите се одржуваат неколку дена откако „Фолксваген“ драстично ги намали прогнозите за профитабилноста.
„ИГ Метал“ бара зачувување на работните места и производството во Германија, како и поголеми инвестиции во домашните погони и нови модели.
Од Владата на канцеларот Фридрих Мерц синдикатот, меѓу другото, бара пониски цени на електричната енергија, подобра заштита од евтин увоз и поддршка за добавувачите во процесот на реструктуирање.
