Повеќе контејнери биле запалени синоќа во скопската населба Ново Лисиче и на булеварот „Македонско-косовска бригада“, информира градоначалникот Орце Ѓорѓиевски, кој побара итна реакција од МВР и откривање на сторителите.
„Го повикувам МВР веднаш да ги провери снимките од „Safe City“, да ги пронајде сторителите и да испита дали палењата се организирани и политички мотивирани. Барам одговорност!“, објави Ѓорѓиевски на социјалните мрежи.
Тој оцени дека палењето на контејнерите е удар врз заедничкиот имот на граѓаните.
„Во услови кога набавивме 3.300 нови контејнери и го решивме проблемот со сметот, очигледно дека на некој не му одговара чисто Скопје и развојот на градот. Ова е удар врз сите скопјани и врз заедничкиот имот, платен со нивни пари“, наведува градоначалникот.
„Ако со ова некој мисли дека мене лично ми прави штета, се лаже! Прави штета на градот, овие контејнери се купени со парите на скопјани!“, наведува градоначалникот во својата објава на Фејсбук.
„Наскоро го завршуваме поставувањето на 200 градски камери за посилен надзор и откривање на ваквите појави и за кои апсолутно нема да има никаква толеранција! Чувајте го Скопје и пријавувајте вандализам. Нема да дозволиме некој да си поигрува со градот! Со законите нема поигрување!“, порача тој.
