Израелскиот премиер, Бенјамин Нетанјаху за време на разговор зад затворени врати им рекол на свои доверливи соработници дека Израел има многу мала можност да влијае врз одлучувањето на Доналд Трамп во врска со Иран, додека американскиот претседател преговара за договор во војната што трае речиси три месеци, изјавија два извори – пишува новинската агенција Ројтерс.
Коментарите на Нетанјаху, кои за Ројтерс ги опишале двајца израелски функционери запознаени со разговорите, доаѓаат во време кога Израел во голема мера е изоставен од преговорите за постигнување првичен договор за запирање на војната, која започна со заеднички американско-израелски бомбардирања.
И САД и Иран ги намалија очекувањата за скорешен пробив во преговорите, а двете страни и понатаму остануваат во несогласување околу нуклеарните амбиции на Иран, барањата на Техеран за укинување на санкциите и војната на Израел во Либан против милитантите на Хезболах.
Британски Гардијан, пренесе дека крајнодесничарските членови на коалицијата на Нетанјаху сега вршат притисок врз него да му се спротивстави на американскиот претседател поради делумниот прекин на огнот со Хезболах во Либан, кој беше спроведен под притисок од Вашингтон.
„Време е премиерот да удри со тупаница на масата на Трамп и да го извести дека се враќаме во војна во Либан“, напиша министерот за национална безбедност Итамар Бен-Гвир на социјалните мрежи.
Загриженоста за заканите од Иран и неговите сојузници најверојатно стои зад анкетите што покажаа силна поддршка меѓу Израелците за одлуката за влегување во војна со Иран, дури и по недели ракетни напади.
Веднаш по прекинот на огнот, повеќе од една третина од еврејските Израелци изјавиле дека се многу или донекаде незадоволни од него, наспроти нешто повеќе од една четвртина кои биле многу или донекаде задоволни што борбите престанале, според Израелскиот институт за демократија.
Поддршката за владата, сепак почна да опаѓа како што конфликтот се одолговлекуваше без знаци за промена.
Но, не целата критика беше насочена кон Нетанјаху, и не сите што беа незадоволни од договорот ја жалеа војната.
Сепак, нацртот на очигледниот план на Трамп наиде на мала поддршка во Израел – објави Гардијан.
„За заслуга на Трамп, мора да се каже дека барем се обиде“, напиша новинарот и аналитичар, Ариел Кахана во дневниот весник на хебрејски јазик „Израел денес“.
„Неговата смела подготвеност да ја ослободи огромната огнена моќ на САД врз Иран е десетици пати подобра од историската немоќ што ја покажаа сите негови претходници. Суштината е дека Иран може и му прикажува на светот слика на победа само поради фактот што сè уште стои. Трамп, засега, нема слична противслика што би ја покажал. Тоа не се многу добри вести за израелскиот народ.“
