Поради исклучително силниот Ел Нињо, светот треба да се подготви за екстремна топлина, суши и поплави во наредните месеци, предупреди во четврток Светската метеоролошка организација (СМО).
Температурите на океаните во тропските региони на Тихиот Океан, кои влијаат на времето низ целиот свет, се веќе екстремно високи, објави агенцијата на ОН со седиште во Женева.
„Ел Нињо добива огромни размери пред нашите очи“, објави генералниот секретар на ОН, Антонио Гутереш.
Агенцијата на ОН ги базира своите прогнози за Ел Нињо врз пресметките на неколку метеоролошки служби низ целиот свет. Овој метеоролошки феномен се јавува природно на секои две до седум години и не е предизвикан од климатските промени, иако може да ги зголеми своите ефекти.
„Сега постои трка помеѓу растечките ризици и нашата посветеност да преземеме климатски мерки и да ги заштитиме луѓето. Мора да ја добиеме таа трка“, рече Гутереш.
Ел Нињо започнува со затоплување на температурите на површината на морето во централниот и источниот екваторијален Пацифик. Според СМО, температурите таму веќе се помеѓу 2,2 и 2,6 степени над просекот.
Температурите на водата под површината во јули и почетокот на август на некои места беа повеќе од осум степени над просекот.
Топлиот и влажен воздух потоа се крева во тој регион и ги менува глобалните модели на ветер и циркулација на атмосферата. Ова често носи суви услови и суша во Австралија, Индонезија и јужна Африка, додека западниот брег на Јужна Америка, источна Африка и јужните Соединети Држави често доживуваат обилни врнежи од дожд. Европа е генерално помалку погодена.
